Il-Kap Nazzjonalista Bernard Grech giddeb lill-Eks Viċi Kap Nazzjonalista Robert Arrigo. Huwa għamel dan barra d-Dar Ċentrali wara laqgħa tal-Grupp Parlamentari Nazzjonalista, it-Tnejn filgħaxija.
ONE News staqsa lil Bernard Grech dwar l-akkużi ta’ Robert Arrigo fl-aħħar diskors tiegħu bħala Viċi Kap Nazzjonalista fl-għeluq tal-Kunsill Ġenerali tas-Sibt.
Hemmhekk Robert Arrigo b’uġigħ spjega kif huwa ġie mwarrab mill-Partit Nazzjonalista u t-tmexxija tiegħu saħansitra qaltlu li huwa tajjeb biss biex jiġbor il-flus.
Madankollu, quddiem mistoqsijiet b’rabta ma’ dan, Bernard Grech giddeb lil Robert Arrigo.
Meta ikkonfrontat, wieġeb “Ma huwa veru xejn, ma huwa veru xejn.”
Fost oħrajn, ftit tal-jiem ilu, Robert Arrigo spjega kif minkejja li kien jokkupa l-kariga ta’ Viċi Kap tal-Partit Nazzjonalista, huwa lanqas tħalla jitla’ fl-ewwel sular tal-Każin tal-Partit Nazzjonalista f’Ħaż-Żabbar. Dan filwaqt li l-kunsillier tal-Mellieħa Emvin Bartolo, magħruf għall-qrubija tiegħu ma’ Grech, lanqas ħalla lil Viċi Kap Nazzjonalista jitla’ fuq il-palk waqt rally f’Tas-Sliema, fl-aħħar kampanja elettorali.
Iżda Bernard Grech injora anki dak li esiġa Adrian Delia, li saħaq li fuq dak li sar lil Arrigo trid tinġarr ir-responsabilità u l-affari mhux se tieqaf hawn.
Minn fuq, Grech ried inaqqas dak li qal Arrigo, li ma kienx l-ewwel wieħed li espona l-mibegħda li tirrenja fil-Partit Nazzjonalista.
One News – “Gideb jiġifieri?”
Bernard Grech – “Insellmilkom.”
Din mhux l-ewwel darba li l-Kap Nazzjonalista Bernard Grech spiċċa jgiddeb lid-deputati tiegħu stess li ġew murija l-bieb ta’ barra tad-Dar Ċentrali.
Fost dawn kien hemm ukoll l-eks Deputat Nazzjonalista Mario Galea li kien spjega kif nies qrib il-Kap Bernard Grech kienu għamlulu ħajtu infern. F’intervista separata wkoll kien spjega kif is-sitwazzjoni fil-Partit Nazzjonalista hija waħda tossika u t-tibdiliet li saru, kienu tibdiliet kożmetiċi.
Bl-istess mod kif indirizza l-akkużi ta’ Robert Arrigo, Bernard Grech kien fil-fatt giddeb lil Mario Galea wkoll.
“Dwar Mario Galea. Dwar Mario Galea jien ma jirriżultali bl-ebda mod dak illi qed jgħid Mario Galea.”
Wara d-diskors t’Arrigo, Mario Galea nnifsu ħareġ jappoġġja lil Robert Arrigo.
F’kitba fuq Facebook, spjega kif Robert Arrigo huwa l-aħħar wieħed minn lista twila ta’ nies li spiċċaw għaddew minn infern taħt it-tmexxija tal-Partit Nazzjonalista ta’ ifred u saltan.
Temm jgħid kif il-Partit Nazzjonalista spiċċa jnaffar lil min ta ħajtu u saħħtu għall-Partit.
