L-Eks Kap Nazzjonalista Adrian Delia qal li fil-Partit Nazzjonalista hemm min qed joħloq il-mibegħda.
Delia qal dan ma’ ONE News barra l-Parlament hekk kif fl-aħħar jiem kompliet tidher biċ-ċar il-qasma fonda li għandu l-Partit Nazzjonalista fi ħdanu.
Dan wara l-irtirar ta’ disa’ kandidati, lejliet l-elezzjonijiet tal-Kumitati Sezzjonali b’riżultat ta’ manuvri ċari fuq il-midja soċjali minn esponenti tal-fazzjoni ta’ Simon Busuttil biex fl-istess elezzjonijiet jiġu mitfugħa blockvotes lill-kandidati li jissimpatizzaw ma’ Bernard Grech biss.
B’riżultat ta’ dan, dawn id-disa’ kandidati magħrufa għall-appoġġ tagħhom lejn Adrian Delia, irriżenjaw hekk kif ħassewhom imminati.
Dakinhar stess filgħaxija Adrian Delia reħilha għal Facebook sabiex jgħaddi messaġġ iebes lit-tmexxija preżenti Nazzjonalista u lil Bernard Grech.
B’rabta ma’ dan, ONE News staqsa lil Adrian Delia dwar dan il-ġlied fil-miftuħ, li reġa’ kixef kemm għadhom jiddominaw iż-żewġ fazzjonijiet f’tal-Pietà.
“Dan ma hemmx tiegħi, tal-ieħor, ta’ dak. Ma jistax min għandu dik it-tip ta’ mentalità li imbagħad terġa’ jużaha biex tattakka u b’xi mod jew ieħor jikrea internament pockets ta’ mibegħda. It doesn’t make sense llum.”
Lil Bernard Grech, Delia qallu li mhux f’lokha sitwazzjoni li jiġu mgerrxa n-nies mill-Partit.
“Meta jkollok sitwazzjoni li jgerxu lil min irid jaħdem naħseb li ma hijiex xi ħaġa li twassal li tinkoraġixxi aktar nies jagħtu s-sehem tagħhom.”
B’rabta mal-istqarrija li għamel fuq il-profil tiegħu fuq Facebook Adrian Delia qal li kien ċar ħafna.
“Is-sejħa tiegħi f’dik il-post kienet li nieqfu, kont ċar u skjett ħafna li nieqfu ngerrxu lin-nies.”
Permezz ta’ botta sottili lejn it-tmexxija ta’ Bernard Grech temm jitkellem fuq il-piki personali.
“Naħseb li kull wieħed u waħda minna jekk vera jinża’ dawk li huma l-piki personali u kull ħaġa li tgħin tkabbar l-ego tiegħek imbagħad inkunu verament jirnexxielna nikkontribwixxu lejn il-politika.”
