Il-Ministeru għall-Edukazzjoni u x-Xogħol jiftaħ il-bibien tal-avveniment ‘I Choose – Nagħżel il-Karriera Tiegħi’ għat-tielet sena konsekuttiva f’Dar il-Mediterran għall-Konferenzi, il-Belt Valletta.
Din hi opportunità eċċellenti biex l-istudenti jattendu għal dan l-avveniment u jiksbu għarfien adegwat dwar korsijiet differenti li jistgħu jsegwu wara l-edukazzjoni obbligatorja. Dan l-avveniment hu mmirat lejn studenti tas-Sena 10 (Form 4), tas-Sena 11 (Form 5) u lejn studenti postsekondarji li fil-ġejjieni qarib se jkunu qed jieħdu deċiżjonijiet kritiċi dwar il-karrieri futuri tagħhom, iżda hu miftuħ ukoll għal kull min jixtieq jikseb informazzjoni dwar tipi differenti ta’ edukazzjoni li jwasslu għal karrieri b’mod wiesgħa.
Matul dan l-avveniment se jiġu esebiti karrieri diversi minn istituzzjonijiet varji bħas-‘Sixth Form’, l-MCAST, l-Istitut għall-Istudji Turistiċi (ITS), u l-Università ta’ Malta fost l-oħrajn. B’mod speċjali f’dan l-istadju, l-attenzjoni b’mod individwali hi importanti u għaldaqstant team ta’ guidance se jkun preżenti għal sessjonijiet ta’ gwida għall-istudenti, wieħed għal wieħed. Għadd ta’ diskussjonijiet interessanti dwar karrieri varji se jitwasslu minn kelliema u minn professjonisti li ġejjin minn setturi privati u oħrajn.
Din il-fiera edukattiva se tkun mifruxa fuq jumejn u tibda mil-lum il-Ġimgħa, 7 ta’ Lulju mill-16.00 sat-20.00, u tkompli għada s-Sibt 8 ta’ Lulju mit-09.00 sal-17.00. Għal aktar tagħrif dwar ‘I Choose – Nagħzel il-Karriera Tiegħi’ żur is-sit elettroniku edu.gov.mt/ichoose.
