Zabbar St Patrick fetħu l-impenji tagħhom fit-tieni round tal-Kampjonat Premier b’rebħa ferm siewja fuq Sliema Wanderers grazzi għal goal uniku skurjat lejn tmiem l-ewwel taqsima minn Strahinja Jovancic.
Għalkemm kellhom l-aktar mil-logħob, Sliema pjuttost iddiżappuntaw u zgur li jridu jtejbu l-logħob tagħhom jekk iridu jispiċċaw fost l-ogħla timijiet fil-klassifika.
Sliema kellhom l-aktar mil-logħob għal ħafna ħin matul l-ewwel taqsima imma kellna nistennew sad-29 minuta sabiex nassistu għall-ewwel azzjoni denja meta Geoffrey Acheampong ittanta xortiħ b’xutt angolat li għadda ftit barra.
Fid-39 minuta Sliema reġgħu resqu qrib permezz ta’ freekick insidjuż ta’ Steven Pisani li għadda tul il-lasta imma ma sab lil ħadd min jikkonkludi.
Zabbar ħolqu l-ewwel periklu fil-41 minuta permezz ta’ xutt mill-bogħod ta’ Dorde Jovicic li l-goalkeeper Slimiż Agu salva f’corner. Mill-corner mogħti minn Stefan Ilic kien Strahinja Jovancic li b’daqqa ta’ ras tefa’ l-ballun fix-xibka għall-vantaġġ xejn mistenni għal Ħaz-Zabbar.
Fl-44 minuta Simon Zibo xxuttja barra mill-qrib wara li rċieva mingħand Jean Borg, waqt li fil-ħin miżjud l-istess Zibo kellu goal imħassar għal offside.
Kif mistenni Sliema ħarġu fuq l-attakk fit-tieni taqsima u fit-48 minuta Acheampong kellu xutt li għadda ftit għoli.
Zabbar iddefendew tajjeb tant li kellna nistennew sat-73 minuta biex naraw azzjoni oħra perikoluża minn Sliema bil-goalkeeper Matthew Grech isalva f’corner xutt ta’ Acheampong.
Tliet minuti wara Grech reġa’ wettaq save tajjeb fuq tentattiv ta’ Mohamed Awad, waqt li fit-80 minuta kien is-solitu Acheampong li nkariga ruħu minn freekick imma x-xutt ċentrali tiegħu ftit li xejn inkwieta lil Grech.
Fit-88 minuta id-difensur Slimiż Murilo ħelisha ħafif meta r-referee ħalla l-logħob għaddej għal dik li dehret daħla diskutibbli fuq Diogo Tavares li kien jiġi f’qagħda tajba kieku għadda.
L-istess Murilo ntwera karta ħamra diretta mir-referee Tonna minuta wara meta deher ixejjer bis-sieq lil Keqi.
Għalkemm b’10 players Sliema għafsu ħafna biex isalvaw ir-riżultat fl-aħħar ħinijiet iżda Zabbar għarfu jiddefendu tajjeb biex żammew ir-riżultat minimu favur tagħhom.
Referee: Glenn Tonna
Plejer tal-Logħba: Strahinja Jovancic (Zabbar St Patrick)
