It-tieni edizzjoni ta’ The Malta Illuminated Trail bdiet tittella’ ġewwa l-Palazz tal-Verdala, fil-Buskett.
Il-Palazz tal-Verdala ser jinbidel f’pajsaġġ tal-Milied, b’bosta strutturi tal-Milied se jkunu mixgħula matul il-lejl.
Dan filwaqt li wieħed jimxi madwar il-pajsaġġ waqt li jżur postijiet differenti tal-attività.
Parti mill-qligħ minn din l-attività ser ikun qed imur għand il-Malta Community Chest Fund u donazzjoni se tiġi ppreżentata fl-Istrina.
Il-pajsaġġ imtella’ mis-settur privat, ra l-kolloborazzjoni tal-Awtorità Maltija għat-Turiżmu hekk kif dan ser ikompli jżid mal-prodott turistiku li pajjiżna ser ikun qiegħed joffri matul dan iż-żminijiet ta’ festi.
Iċ-Chairman tal-MTA Gavin Gulia saħaq kif din l-attrazzjoni qed tgħaqqad l-istorja mżewqa tal-Palazz tal-Verdala, mal-kreattività tal-pajsaġġ li mistenni joffru esperjenza unika.
B’hekk minkejja l-isfidi li affaċja s-settur turistiku ta’ pajjiżna, dan xorta waħda qiegħed isib modi kif ikun kreattiv bil-għan li jwassal l-aqwa prodott.
L-imprenditur Matthew De Giorgio, li qiegħed jorganizza din l-attrazzjoni saħaq kif minkejja l-isfidi marbuta mal-pandemija xorta waħda kabbru dan l-avveniment, filwaqt li nnota l-kolloborazzjoni mal-Gvern li qed tħalli l-frott tagħha.
Qal, “Is-sena l-oħra għamilniha ġo post differenti għax għamilniha drive thru, din is-sena ridna nagħmluh walk thru u ġejna fiż-żona tal-Verdala. Ovvjament mingħajr l-għajnuna tal-Gvern ukoll magħna diffiċli biex tipproduċi affarijiet bħal dawn.”
Il-Ministru għat-Turiżmu, Clayton Bartolo iddeskriva din il-ħidma mas-settur privat bħala waħda importanti għas-suċċess ta’ pajjiżna.
Qal, “Is-suċċess tas-settur turistiku huwa grazzi għal kolloborazzjoni mill-qrib illi nsibu ukoll mas-settur privat. Waqt il-pandemija ħdima mill-qrib ħafna mal-privat biex naraw li ma jaqa’ ħadd lura issa l-għan tagħna huwa illi waqt iż-żmien ta’ rkupru naraw lil kulħadd jimxi ’l quddiem flimkien biex is-suċċessi illi niksbu bħala pajjiż ikunu is-suċċessi tal-poplu Malti u Għawdxi kollu kemm hu.”
The Malta Illuminated Trail se ddum miftuħa sad-9 ta’ Jannar.
