Wara operazzjoni delikata ta’ 17-il siegħa, għall-ħabta tas-2.30am tal-Erbgħa filgħodu l-Pulizija arrestat lil Roderick Cassar, ta’ 41 sena, mill-Qrendi u li qed jitqies bħala s-suspettat ewlieni fil-qtil ta’ martu Bernice Cassar.
Il-femiċidju seħħ it-Tlieta għall-ħabta tat-8am fiż-Żona Industrijali ta’ Kordin, f’Raħal Ġdid. Il-vittma, omm ta’ żewġt itfal ċkejknin, inqatlet b’żewġ tiri, wieħed f’wiċċha u l-ieħor f’sdiriha, u nstabet bla ħajja biswit il-karozza tagħha.
L-allegat qattiel, li kien qed iswgwi lill-vittma, immedjatament ħarab minn fuq il-post bil-karozza tiegħu wara li allegatament sparalha u qatilha u nqafel f’daru fi Triq il-Kartaġiniżi, il-Qrendi.
Hemmhekk, is-sitwazzjoni kienet qed titqies bħala waħda perikoluża hekk kif Roderick Cassar kien għadu armat bis-senter li allegatament intużat fil-qtil.
Il-pulizija, permezz tal-Ispettur Omar Zammit, wettqet sigħat sħaħ ta’ negozjati ma’ Roderick Cassar sabiex jagħti ruħu bi jdejh. F’dawn il-mumenti, qraba u anke ġar tal-allegat qattiel ippruvaw ikellmuh sabiex jikkonvinċuh iċedi.
Fil-Qrendi kien hemm numru ta’ membri tal-forzi dixxiplinati, fosthom taqsimiet differenti mill-Korp tal-Pulizija, membri mid-Dipartiment tal-Protezzjoni Ċivili, u anke ambulanza b’tim mediku mmexxija mit-tobba tal-emerġenza.
Kien fis-sigħat bikrin tal-Erbgħa filgħodu meta azzjoni mill-Pulizija kienet waħda ta’ suċċess hekk kif irnexxielha tarresta lil Roderick Cassar u anke televa l-arma li allegatament intużat fil-qtil.
Preżenti fuq il-post, il-Kelliem tal-Pulizija Brandon Pisani ta l-informazzjoni dwar kif ġie arrestat Cassar: “Il-Pulizija tal-SIU żgassaw u daħlu fl-appartament tal-allegat agressur li jinsab fit-tieni sular ta’ blokka ta’ appartamenti fi Triq il-Kartaġiniżi, il-Qrendi, fejn hemmekk ġew sparati numru ta’ flashbangs u r-raġel ġie arrestat ftit tal-ħin ilu. Fuq il-post il-pulizija sabet ukoll l-arma li x’aktarx intużat fil-qtil. Filwaqt li r-raġel ma sofra l-ebda ġrieħi waqt dan l-arrest huwa xorta waħda qed jiġi assistit minn tim mediku tal-ambulanza li jinsabu fuq il-post.”
L-Erbgħa filgħodu, l-allegat qattiel ta’ Bernice Cassar inħareġ mill-Isptar Mater Dei u ttieħed fil-Kwartieri Ġenerali tal-Pulizija, fil-Furjana, sabiex jiġi interrogat minn uffiċjali fi ħdan it-Taqsima tal-omiċidji.
Dan ifisser li l-pulizija għandha ċans ta’ 48 siegħa biex tressaq lil Roderick Cassar il-Qorti u tixlih bi qtil volontarju ta’ martu Bernice.
Intant, għall-ħabta tas-7pm ilbieraħ il-Kummissarju tal-Pulizija Angelo Gafà indirizza konferenza tal-aħbarijiet, li fiha ta l-aħħar dettalji dwar il-femiċidju.
Fost l-oħrajn, il-Kummissarju tal-Pulizija qal li Bernice Cassar kienet vittma ta’ vjolenza domestika mir-raġel tagħha, illum is-suspettat bil-qtil tagħha.
Il-Kummissarju qal li “f’dan l-istadju jista’ jiġi kkonfermat li, minn Mejju ta’ din is-sena, il-vittma għamlet ħames rapporti mal-pulizija fil-konfront tar-raġel tagħha b’rabta ma’ vjolenza domestika, bl-aħħar wieħed kien it-Tnejn filgħodu. Minn dawn ir-rapporti juru li sofriet ġrieħi ħfief u oħrajn vjolenza psikoloġika. Fl-aħħar xhur il-vittma kienet qed tiġi offruta għajnuna mill-Victim Support Agency tal-Pulizija.”
Huwa qal li l-Pulizija kienet ħarġet akkużi fil-konfront tar-raġel tagħha fi tliet każijiet separati.
Intant, fil-mumenti li fihom kienet għaddejja l-operazzjoni fil-Qrendi u waqt li kien maqful f’daru, Roderick Cassar kien qed itella’ kitba fuq Facebook u anke jagħmel kuntatt ma’ ħu l-vittma Bernice Cassar.
Fl-ewwel messaġġ, u ftit mumenti wara li allegatament qatel lil martu, fuq il-Facebook, Cassar kiteb messaġġ indirizzat liż-żewġ uliedu, li fih qalilhom li jħobbhom. Huwa kiteb ukoll li ma setax jgħix mingħajrhom.
F’kitba oħra fuq il-Facebook, tella’ ritratt ta’ konverżazzjoni bejnu u bejn dik li jidher li hi ħabiba tal-vittma.
Aktar tard filgħaxija, 11-il siegħa wara li kien seħħ il-qtil, ħu Bernice Cassar tella’ parti minn konverżazzjoni li fiha wera kif l-allegat qattiel kien qed ikellmu.
