Bħal-lum ġimagħtejn mistennija naraw xeni li rajna f’pajjiżi oħra bħar-Renju Unit fejn f’Malta se tibda tingħata t-tilqima għal kontra l-Covid-19.
F’pajjiżna mistenni jasal il-vaċċin tal-Pfizer u BioNtech mill-Belġju.
Dan kollu spjegah id-Deputat Prim Ministru u Ministru għas-Saħħa Chris Fearne waqt il-programm Temi ppreżentat minn Nigel Vella fuq ONE Radio.
Huwa spjega: “Kif qed ikun hemm dik l-awtorizzazzjoni li qed nistennewha tkun jew lejliet jew fil-ġurnata tal-Milied, il-vaċċin jitlaq mill-Belġju fejn huwa manifatturat u jiġi fi triqtu lejn Malta. Qed nistennew li jieħu madwar tlett ijiem biex jasal Malta li jfisser illi bejn wieħed u ieħor illi bħal-lum ħmistax inkunu bdejna nagħtu l-vaċċin ġewwa pajjiżna.”
Fuq ONE Radio, id-Deputat Prim Ministru qal li l-awtoritajiet tas-saħħa mhux se jitilfu żmien fil-perjodu qasir ta’ vjaġġ tal-vaċċin mill-Belġju.
Spjega kif in-nies se jibdew jirċievu notifika biex imorru ħalli jitlaqqmu.
Id-Deputat Prim Ministru Chris Fearne sostna: “Issa aħna li dakinhar li jitlaq mill-Belġju lejn Malta ħa nibdew noħorġu l-inviti lill-persuni illi aħna qed inqisu li huma l-aktar vulnerabbli, allura li ħa jieħdu l-vaċċin l-ewwel biex ikunu jafu fejn u meta jridu jmorru jiħduh. Bejn wieħed u ieħor aħna qegħdin nikkalkulaw illi l-invit dak li jkun jirċevih qisu ħamest ijiem-ġimgħa qabel ma jkollu għalfejn mid-data u l-ħin ta’ fejn ikun irid imur jieħdu. Dan ikollok ħamest ijiem-ġimgħa ċans biex inti tkun ċert li tista’ tmur f’dak il-post jew jekk ma tistax jew inqalgħalek xi ħaġa ċċempel u nagħtuk data oħra.”
Il-Ministru għas-Saħħa qal ukoll li wieħed m’għandux jaħseb li ntesa’ jekk ma jirċevix in-notifika biex imur jirċievi l-vaċċin iżda spjega kollox se jaħdem b’mod sistematiku u fuq medda ta’ xhur se jkun qed jitlaqqam mingħajr ħlas, il-poplu kollu.
Huwa tenna: “Anki dawk in-nies mhux se jirċievu kollha l-invit fl-istess ġurnata. Ħa jirċevuh kuljum u ħa jkun hemm grupp ta’ nies li jibdew jirċevuh. U allura wieħed m’għandux għalfejn jinkwieta jekk ikun sema’ li xi ħaddieħor irċieva l-invit biex jieħu t-tilqima u lilu għadna m’għajjatnilux għax ħa nkunu qegħdin nagħmluha b’mod sistematiku u b’mod gradwali biex l-ewwel nibdew b’min hu l-aktar vulnerabbli, nies li jaħdmu fl-isptarijiet u nies li jaħdmu fil-qasam tas-saħħa, nies li jgħixu fid-djar tal-anzjani, il-carers ta’ dawn in-nies. Imbagħad nibdew ninżlu fl-etajiet, nagħtu lil min hu l-aktar vulnerabbli sakemm eventwalment fuq medda ta’ numru ta’ xhur inkunu laqqamna l-poplu Malti u Għawdxi kollu.”
