Il-Kap Nazzjonalista Bernard Grech qed jaffaċċja rivolta fil-kumitati sezzjonali tat-tieni distrett wara li sar magħruf li aktarx Stephen Spiteri jingħata l-ġenb u jitneħħielu l-portafoll tas-saħħa, fix-shadow cabinet li qed jagħmel il-Kap, iżjed minn mitt jum wara li laħaq.
Membri tal-kumitati sezzjonali tat-tieni distrett qed jheddu li jirriżenjaw f’daqqa jekk Spiteri mhux se jibqa’ kelliem għas-saħħa.
Stephen Spiteri, tabib maħbub fuq it-tieni distrett mistenni jingħata l-qasam tas-saħħa mentali.
Il-mossa li jitwarrab tabib li jġib saħħa ta’ voti għall-Partit Nazzjonalista fuq it-tieni distrett ma niżlet xejn tajjeb, iktar u iktar li dan il-qasam mistenni jingħata lil Claudio Grech.
Fuq din il-mossa kellna l-konferma ta’ Wayne Hewitt, esponent favur Bernard Grech li kiteb fuq Facebook u qal li fis-saħħa għandek bżonn manager u mhux tabib.
Stephen Spiteri kien id-deputat li quddiem il-President ta’ Malta ma sfiduċjax lil Adrian Delia minn Kap tal-Oppożizzjoni iżda kien astjena.
Intant fil-grupp parlamentari Nazzjonalista jidher li qam rebus sħiħ u issa t-taħdidiet mad-deputati daħlu fit-tielet jum fejn numru ta’ membri parlamentari Nazzjonalista qed imorru fid-Dar Ċentrali wieħed wieħed.
Preżenti għal-laqgħat ma’ Bernard Grech qed ikun hemm Ray Bezzina, eks Chief of Staff ta’ George Pullicino.
Bezzina qed ikun f’dawn il-laqgħat fuq insistenza tal-eks Segretarju Ġenerali tat-tmeninijiet Louis Galea, li issa għandu uffiċċju maġenb il-Kap fl-istamperija.
Kien hemm uħud mid-deputati li oġġezzjonaw għall-preżenza ta’ Ray Bezzina fil-laqgħa mal-Kap u ma ridux jitkellmu ma’ Bernard Grech qabel ma’ Bezzina jħalli l-kamra.
Therese Comodini Cachia hija waħda li ġiet rappurtata li sabbtet il-bieb f’wiċċ il-Kap hekk kif ħarġet mil-laqgħa mhux kuntenta b’dak li offrielha Bernard Grech.
Deputati tal-fazzjoni Delia, jiġifieri Robert Arrigo u Mario Galea spiċċaw tilfu l-portafoll li dejjem tkellmu għalih.
Mhux magħruf għala Arrigo spiċċa tneħħielu t-turiżmu u x’ġie offrut minflok.
Sa issa mhux magħruf ukoll jekk wara dan l-aħħar ġlied li qam, Bernard Grech hux jirrikunsidra ċertu ċaqliq li kien se jagħmel.
Mhux magħruf lanqas jekk Adrian Delia kellux xi laqgħa oħra mas-suċċessur tiegħu hekk kif l-aħħar informazzjoni minn ġewwa l-istamperija għadha tgħid li Delia ma jridx ikun fix-shadow cabinet ta’ Bernard Grech.
