Lejlet il-Budget, tard il-Ħadd filgħaxija, il-Partit Nazzjonalista nħakem minn paniku totali fuq produzzjoni awdjo-viżiva li l-Gvern bagħat fi stqarrija lill-mezzi tax-xandir biex iniedi t-tema tal-Baġit 2025.
Kien ftit qabel l-10 ta’ bil-lejl li l-Kap Bernard Grech irrikorra għal facebook biex jhedded b’azzjonijiet legali fuq video li fih jitkellmu nies differenti minn kull qasam tal-ħajja dwar l-istorja tagħhom.
Fosthom dwar xi tfisser għalihom ħajja ta’ kwalità, fuq l-importanza li pajjiżna jinvesti iktar fl-isport u l-ħin l-liberu, fuq il-ħtieġa ta’ iktar spazji miftuħa u fuq l-istigma tas-saħħa mentali.
Fi tmiem din il-produzzjoni, il-Prim Ministru Robert Abela jgħid li qed jifhem il-prioritajiet u t-tħassib tan-nies u li issa li l-pajjiż għamel progress ekonomiku qawwi, wasal iż-żmien li nagħżlu l-kwalità fuq il-kwanità.
Dr Abela qal li b’hekk se niggarantixxu li n-nies igawdu l-aħjar f’pajjiż trankwill u sigur.
Din il-produzzjoni kienet inkluża ma’ stqarrija maħruġa mill-Gvern ta’ Malta dwar it-tema tal-Baġit li se jiġi ppreżentat illejla u fil-fatt il-media kollha ppublikat dan il-messaġġ.
Iżda pront qam il-Partit Nazzjonalista u l-Kap tiegħu Bernard Grech li fuq facebook kiteb li mhux se jittollera dak li sejjaħ propoganda dwar il-Baġit.
Grech ħadha bi kbira li l-istazzjon nazzjonali ħabbar ukoll din it-tema tal-Baġit u qal li permezz ta’ din il-produzzjoni awdjo-viżiva l-Partit Nazzjonalista sofra preġudizzju.
Il-Kap tal-Oppożizzjoni talab lill-Awtorità tax-Xandir biex twaqqaf lill-Prim Ministru milli jitkellem dwar il-Baġit u jekk dan ma jsirx, qal li se jkun qed jieħu passi ulterjuri.
ONE News huwa nfurmat li l-moħħ wara din ir-reazzjoni estremista ma kien ħadd ħlief id-deputat nazzjonalista tal-Blue Heroes, u ħu l-President Onorarju tal-għaqda Repubblika, Karol Aquilina li fl-aħħar ġimgħat ħa taħt idejh il-kontroll tad-direzzjoni tal-grupp parlamentari nazzjonalista dwar il-media.
Il-gazzetta KullĦadd u ONE News kienu żvelaw dokument intern li juri kif Aquilina kien diġa ordna lid-deputati li għandhom iżidu d-doża ta’ negattività u attakki fuq kull ħaġa li jitħabbar dwar il-Baġit 2025.
Din l-ordni bdiet tiġi segwita minn lejlet il-Baġit stess, b’reazzjoni isterika mill-Kap tal-Oppożizzjoni Bernard Grech li qed jinsisti li l-Prim Ministru Robert Abela m’għandux jitkellem dwar il-Baġit.
Ma’ din il-pożizzjoni estremista ta’ Bernard Grech, kif imposta minn Karol Aquilina, ngħaqdu esponenti oħrajn nazzjonalisti, fosthom is-Segretarju Ġenerali Michael Piccinino li kiteb li mhux se jħalli lil Robert Abela jwassal il-propoganda tal-Partit Laburista.
Oħrajn qalu li l-Partit Nazzjonalista għandu jħabbar bojkott lill-istazzjon nazzjonali talli xandar din il-produzzjoni awdjo-viżiva bit-tema tal-Baġit.
