Waqt id-diskors tal-Prim Ministru Robert Abela fil-Parlament dwar l-estimi finanzjarji għall-uffiċċju tiegħu, il-Kap tal-Oppożizzjoni Bernard Grech infexx f’dagħdigħa ta’ diskors dispreġġjattiv min-naħa għall-oħra tal-Kamra.
Viżibilment mifxul quddiem l-argumenti b’saħħithom tal-Prim Ministru, fejn ta spjegazzjoni ċara kemm tal-miżuri tal-Baġit 2025 u l-viżjoni tal-Gvern għas-snin li ġejjin, Grech spiċċa jgħajjat u jipprova jipprovoka lil Dr Abela.
Fil-fatt, fost il-frażijiet xejn dekorużi li ma ddejjaqx jesprimi fl-ogħla istituzzjoni tal-pajjiż, Grech sejjaħ lil Dr Abela “Prim Buffu” kif ukoll “Prim Korrott”.
ROBERT ABELA: “U nfakkrek li kull darba li qed tipponta subgħajk lejn din in-naħa u tgħidilna frodisti, ftakar li għandek erbat iswaba’ jippontaw lejk. Dik infakkarilek biex ma tinsihiex, Prim evażur tat-taxxa, biex ma tinsihiex.”
BERNARD GRECH: “Prim korrott.”
Frażijiet li jintużaw mill-esponenti estremisti tal-Partit Nazzjonalista, magħrufin ukoll bħala tal-Blue Heroes, u huma indikattivi ta’ kemm Grech qed ikompli jipprova jindiehes ma’ din il-fazzjoni, hekk kif bħalissa jinsab taħt attakk minn kull faxxa fil-Partit.
Fuq naħa hemm tal-Blue Heroes, li wkoll huma ddisprati li Roberta Metsola qed tgħidilhom li mhux ġejja lura Malta, u issa qed jaraw jerġa’ jfeġġ f’Malta lil Simon Busuttil.
Fuq in-naħa l-oħra, hemm il-fazzjoni tal-eks Kap Adrian Delia li qed tirranka x-xogħol biex Alex Borg jikkontesta għat-tmexxija tal-Partit, tant li l-editorjal tal-Malta Independent tal-lum kien ispirat minnu f’tentattiv ieħor biex jipproġetta ruħu bħala Kap.
Dan id-diżgwid kbir qed iwassal biex il-kariga essenzjali ta’ Segretarju Ġenerali tal-Partit Nazzjonalista wkoll tibqa’ mdendla għalissa, għax il-fazzjonijiet qed jostakolaw kull nomina li qed iressqu dawk il-ftit li fadal madwar Bernard Grech.
Il-kritika lejn Grech fi ħdan il-PN qed tkompli tirranka hekk kif hu ċar li, minkejja l-pariri tas-suppost espert politiku li għażel, l-akkademiku George Vital Zammit, il-Kap qed ikun fjakk immens fl-interventi tiegħu.
Għalhekk li, quddiem diskors ieħor b’saħħtu mill-Prim Ministru, Grech ma kellux għażla oħra ħlief li jinżel fl-aktar livell baxx u juża kliem dispreġġjattiv. F’mument minnhom ukoll instema’ jgħid lill-Prim Ministru “dejjem ftakar fl-isteriods int”.
Diskors li d-Deputat Speaker David Agius, li dak il-ħin kien qed jippresiedi, għażel li ma jikkoreġix. Agius innifsu, meqjus qrib ta’ Grech, jinsab ukoll taħt pressjoni politika hu nnifsu u, minflok, għażel li jwaqqaf lill-Prim Ministru mid-diskors oġġettiv tiegħu fuq suppost point of orders imressqin minn Grech.
Sorsi fil-Partit Nazzjonalista wkoll esprimew li kien hemm deputati Nazzjonalisti anzjani, li dak il-ħin kienu fil-Kamra xejn, u xejn ma ħadu pjaċir b’dan l-atteġġjament infantili, li lanqas għal dibattiti televiżi mhu tajjeb.
Minkejja dan, jidher ovvju li, fid-dawl li xejn mhuma konvinti fuq ir-ritorn propost ta’ Busuttil jew inkella li jilħaq Alex Borg, magħruf fosthom bħala Mr Facebook, s’issa ma jifdallhomx alternattiva ħlief li jkomplu jitqannew bi Grech sakemm ikun hemm qbil min għandu jeħodlu postu.
