Il-Kap Nazzjonalista Bernard Grech inqabad jigdeb fuq l-Istazzjon Nazzjonali dwar is-suġġett tal-IVF.
Dan waqt il-programm Xtra t-Tnejn filgħaxija meta kien qed jiġi mistoqsi dwar l-emendi fil-liġi tal-IVF li ressaq ’il quddiem il-Gvern u li daqt se tibda l-fażi tat-tieni qari fuqhom fil-Parlament.
Meta mistoqsi dwar dawn l-emendi Bernard Grech pprova jinsinwa li l-Partit Nazzjonalista kien dejjem favur din il-liġi.
Fil-fatt, sostna li fl-aħħar emendi tal-2018 l-istess Partit Nazzjonalista vvota favur l-emendi mressqa.
Qal, “Dik il-liġi evolviet u ġiet emendata wkoll u tajjeb li ġiet emendata u mxiet ’il quddiem ukoll u vvutajna favur l-emendi.”
Madankollu dan ma jistax ikun iktar lil hinn mill-verità. Dan hekk kif il-Partit Nazzjonalista fl-aħħar emendi li tressqu mhux talli ma vvutax favur dawn l-emendi iżda kellu deputati voċiferi kontra l-proposti mressqa.
Fosthom kien hemm l-eks Deputat Nazzjonalista Edwin Vassallo li f’Marzu li għadda waqt dibattitu politiku, ġie mfakkar f’dak li kien lura fl-2018, jiġifieri li ma jridx li l-bniedem isir oġġett.
JFP: “Lin-nisa kont għidtilom Edwin li fuq l-IVF id-dibattitu Parlamentari lill-mara lill-IVF tagħmilha oġġett. Għadek taħsiba l-istess?”
EV: “Ma nafx f’liem kuntest kont għidtha.”
JFP: “Net News jiġifieri tagħkom stess. Qed jikkwotak fl-2018 inti x’għidt fuq id-dibattitu tal-IVF. Il-liġi se tibda toħloq iltiema ġodda qabel it-twelid u fejn il-mara se ssir oġġett. Għadek temminha?”
EV: “Jien għidt li jekk l-industrija tal-mediċina tagħmel l-industrija oġġett hi liem hi s-settur tal-mediċina. Il-bniedem ma rridux inħalluh isir oġġett.”
Anke b’reazzjoni għall-proposti mwegħda fil-manifest elettorali tal-Partit Laburista tal-2017 dwar emendi fil-liġi tal-IVF, fil-Parlament Edwin Vassallo kien qal hekk.
Stqarr, “Nerġa’ mmur lura għal din il-wegħda li għandhom il-Partit Laburista fil-programm elettorali tagħhom, il-fatt li wegħdu li se jagħmlu emendi biex fil-liġi jirriflettu l-aħjar avvanzi li saru fit-teknoloġija m’għandu qatt ifisser li din il-wegħda torbot moralment lil kull deputat li bilfors kull emenda li titressaq hawn taħt il-liġi tal-IVF bilfors trid tiġi ivvutata favur inkella jkun qed imur kontra l-whip tal-Partit tiegħu.”
Fil-fatt, meta umbagħad tressqu l-emendi għall-vot fil-liġi tal-IVF fl-2018, Edwin Vassallo kien wieħed minn dawk li vvota kontra filwaqt li spiss tkellem fil-miftuħ kontra diversi drittijiet ċivili.
Intant b’reazzjoni għad-dikjarazzjoni ta’ Bernard Grech fejn ipprova juri li l-Partit Nazzjonalista dejjem kien favur l-emendi fil-liġi tal-IVF, il-Partit Laburista fi stqarrija sostna li l-Partit Nazzjonalista vvota kontra l-emendi sinjifikattivi li kienu pass importanti ‘il quddiem u li fuqhom issa trid tinbena r-riforma li jmiss.
Il-Partit Laburista temm jgħid li jekk anke l-iktar fatti sempliċi qed jibqa’ jġib żbaljati aħseb u wara kemm il-Kap tal-Oppożizzjoni jista’ jkun fdat imexxi riformi bħal dawn. Dan biex b’hekk ikompli jikkonferma kemm fil-Partit Nazzjonalista tassew ma nbidel xejn.
