Il-ġlied fuq id-distretti li se joħroġ fuqhom Adrian Delia qiegħed hemm, kif ikkonferma l-Kap Nazzjonalista Bernard Grech fl-intervista ma’ ONE News.
Il-ġurnalist Colin Deguara staqsa, “Għaliex Jason Azzopardi li qiegħed hawnhekk ħabbar l-għażla tat-tieni distrett fuq xiex se jkun qiegħed jikkontesta, saħansitra qabel ma ġie kkonfermat mill-eżekuttiv u s’issa Adrian Delia għadu ma ġiex konfermat fuq distrett ieħor? Din hija sinjal ta’ dgħufija.”
Grech wieġeb, “Lanqas xejn. Lil Adrian Delia, bla dubju jien nixtiequ li joħroġ fuq distrett partikolari. Jiena u hu nitkellmu u hu jixtieq li joħroġ fuq distrett differenti.”
Meta l-ġurnalist ta’ dan l-istazzjon reġa’ staqsa lill-Kap Nazzjonalista dwar dan, Bernard Grech wieġeb hekk.
Il-ġurnalist ta’ ONE Colin Deguara staqsa, “Jiġifieri għad m’hemmx qbil fuq liema distrett ser joħroġ?”
Bernard Grech qal, “Għadni miniex kuntent, le.”
Adrian Delia huwa kandidat konfermat fuq it-tmien distrett, id-distrett li jinkludi Birkirkara u li ta’ Fenech Adami mhuma kuntenti xejn li Delia ħarġilhom għan-nofs għax hu magħruf li dak id-distrett hu meqjus bħala proprjetà ta’ Fenech Adami.
Esponenti li jkunu mal-għaqda Repubblika fosthom Manuel Delia, saħansitra kitbu li l-Partit Nazzjonalista lanqas għandu jħalli lil Adrian Delia joħroġ f’ismu fl-elezzjoni ġenerali li jmiss.
Intant l-għada li Bernard Grech ġie mistoqsi fuq id-distretti ta’ Delia, nies tal-fazzjoni tal-eks Kap marru fuq il-Fosos b’flokkijiet suwed bil-kliem “Team Adrian Delia”.
Hawnhekk huma ntefgħu fuq wara tal-Fosos u mhux bilqegħda mal-folla preżenti, fejn anke f’xi waqtiet anki bbujaw waqt id-diskors ta’ Bernard Grech.
Sorsi qrib il-Partit Nazzjonalista qalula li t-tmexxija Nazzjonalista ma ħadet xejn gost b’din ix-show of force mill-fazzjoni tal-eks Kap Nazzjonalista.
Waqt l-istess attività, is-Segretarju Ġenerali tal-Partit Nazzjonalista Michael Piccinino tefa’ botta għat-tmexxija ta’ Adrian Delia.
Hekk kif it-tmexxija ta’ Delia, sentejn ilu kienet organizzat il-festi tal-Indipendenza quddiem id-Dar Ċentrali.
Piccinino qal, “Ilbieraħ u llum, kif għedt qabel ġibna l-festi lura fid-dar naturali tagħhom, fuq il-Fosos tal-Furjana.”
