L-establishment Nazzjonalista qed ikun fuq quddiem li jieħu ħsieb il-messaġġ tal-Kap Bernard Grech, anki issa li qed jipprova jnessi l-fatt li l-Kap Nazzjonalista kien għamel snin twal ma jħallasx it-taxxa.
L-Eks Chief of Staff ta’ Austin Gatt u l-moħħ wara d-dħul tal-Arriva f’pajjiżna, Manuel Delia mmonta kampanja kontra l-Prim Ministru anki meta s-swaba’ jippuntaw lejn Bernard Grech li hu stess kien qal li ma ħallasx it-taxxa u l-VAT għal numru ta’ snin.
L-istess messaġġ, bl-istess ritratt t’attakk fuq il-Prim Ministru użah Bernard Grech ftit wara li deher fiċ-ċar li qed jikteb u jwassal dak li jgħidulu dawk li qalulu ma jgħaxxaqhiex għaliex inkella malajr isibu lil xi ħaddieħor bħala Kap tal-Partit Nazzjonalista.
It-Tnejn filgħaxija, f’kummenti lill-ġurnalisti, il-Prim Ministru Robert Abela saħaq li l-informazzjoni li Bernard Grech kien ilu snin ma jħallasx it-taxxa ngħatat lilu minn sors fil-Partit Nazzjonalista.
Il-Prim Ministru Robert Abela stqarr: “L-informazzjoni li ngħatat lili li Bernard Grech kien ilu snin ma jħallas it-taxxa, ingħatat minn sors ġewwa l-Partit Nazzjonalista.”
Bi kliem ċar, il-Prim Ministru qal li huwa informa bin-nuqqasijiet fiskali ta’ Bernard Grech lill-awtoritajiet, kif huwa d-dover ta’ kull ċittadin, f’dan il-każ lil Kap tad-Dipartiment tat-Taxxa Marvin Gaerty.
Il-Prim Ministru qal li huwa ma ddiskuta xejn dwar il-fatt li Bernard Grech kien ilu ma jħallas it-taxxa iżda informa biss lill-awtoritajiet għaliex huwa d-dover ta’ kull ċittadin li fejn jara nuqqas, jinforma lill-awtoritajiet.
Huwa sostna: “M’għedtlekx li ddiskutejt, għedtlek infurmajtu b’dak li jien ġejt infurmat bih. Le le jien infurmat lil Marvin Gaerty b’dak li ġejt infurmat bih dwar il-fatt li Bernard Grech kien ilu s-snin ma jħallas taxxa minn ġo sors fil-Partit Nazzjonalista. Kont ċar ħafna fir-risposta tiegħi.”
It-Times kienet irrappurtat li Bernard Grech kien investigat minn istituzzjoni ta’ kontra l-frodi fit-taxxa wara li nstabu numru ta’ irregolaritajiet u ordnawlu jħallas sbatax-il elf ewro f’pendenzi ma’ tal-VAT.
Dan il-ħlas f’pendenzi ma’ tal-VAT kien każ separat minn pendenzi oħra li kellu ma’ tat-Taxxa.
Huwa kien imwissi minn tat-Taxxa li kellu ħafna pendenzi fi ħlasijiet li jmorru lura saħansitra għal tnax-il sena.
Bernard Grech kien ħallas it-taxxa wara li wera l-interess li jikkontesta għall-kariga ta’ Kap tal-Partit Nazzjonalista.
Meta kien suppost skrutinizzat biex ikun approvat bħala kandidat għal Kap tal-Partit Nazzjonalista, il-kummissjoni li għarblitu kienet saħansitra qalet li s-saga ta’ Bernard Grech tat-taxxa u tal-VAT kienet inżammet mistura minn Grech u Bernard Grech kien ħeba l-istampa kollha tiegħu ma’ tat-taxxa.
Is-saga ta’ Bernard Grech kienet waslet għall-attenzjoni tal-Kummissjoni tal-Partit Nazzjonalista minn rapporti tal-midja.
Issa Bernard Grech qed jipprova jgħatti xturu billi qed iżomm mal-messaġġ tal-fazzjoni ta’ Simon Busuttil li appoġjatu biex sar Kap, bil-Prim Ministru Robert Abela jirrimarka li ma jifhimx il-fatt li f’daqqa waħda qed jiġi ġustifikat il-fatt li għandna Kap tal-Oppożizzjoni li għamel snin ma jħallas it-taxxa.
Intant il-Korp tal-Pulizija ċċara li dak irrappurtat f’The Sunday Times nhar il-Ħadd li għadda, dwar li l-pulizija qed tistenna l-approvazzjoni tal-Prim Ministru biex toħroġ informazzjoni mill-mobile tal-Kap tad-Dipartiment tat-Taxxa, jinkludi asserzjonijiet li mhumiex korretti.
B’rabta ma’ investigazzjoni li qed titmexxa mid-Dipartiment tal-Investigazzjonijiet Finanzjarji, il-Korp tal-Pulizija saħaq b’mod ċar li mhuwiex minnu li l-Pulizija teħtieġ xi awtorizzazzjoni mill-Prim Ministru biex tikseb jew tanalizza mobile u apparat teknoloġiku ieħor.
Il-Pulizija qalet li l-investigazzjoni li saret referenza għaliha mit-Times ilha miexja bla tfixkil, anke bis-sehem ta’ Maġistrat inkwirenti.
