Bernard Grech reħielha jwaħħal f’kulħadd dwar il-problemi li għandu l-Partit Nazzjonalista iżda fl-ebda mument m’assuma parti mir-responsabilità.
Saħansitra f’diskors li għamel fil-Kunsill Ġenerali tal-Partit Nazzjonalista huwa spiċċa jgħid li l-problemi li għandu l-partit u li wasslu għall-ikbar telfa elettorali fl-istorja ta’ Malta sovrana jmorru lil hinn mit-tmexxija tiegħu.
Dan għalkemm kien hu stess li wara li l-Blue Heroes qalftu lil Adrian Delia ‘l barra mit-tmexxija, huwa ħadlu postu bil-wegħda li jmexxi u jġib riżultati aħjar iżda kważi sentejn wara bidel id-diska.
Bernard Grech qal, “Il-problemi li għandna imorru lil hinn minn problema tat-tmexxija.”
Fid-diskors tiegħu fost l-oħrajn huwa individwalizza l-istazzjon tal-midja tal-Partit Nazzjonalista u l-pagi tal-ħaddiema li jaħdmu ma’ dan l-istazzjon bħala problema kbira għall-finanzi tal-partit li jmexxi.
Hu qal, “Kull xahar li jgħaddi qiegħdin nitilfu għexieren ta’ eluf ta’ ewro, mhux illum, għal dan l-aħħar żmien fil-kumpanija tal-midja tagħna.”
Quddiem il-Kunsill Ġenerali f’diskors imxandar fuq l-istazzjon tal-partit huwa spiċċa jagħti x’jifhem li jekk ikun ikkonfermat Kap wara l-elezzjoni interna huwa ser ikollu jbigħ il-każini u d-Dar Ċentrali u jagħlaq l-istazzjon tal-midja biex fi kliemu l-partit isir iżjed sostenibbli u jsib tarf tal-problemi finanzjarji kbar.
Il-Kap Nazzjonalista rrimarka,“Ebda kap ma jrid jew ma jixtieq li jbieħ każin, l-ebda kap ma jixtieq li joħroġ mid-dar ċentrali, l-ebda kap ma jrid iċedi l-midja tagħna.”
Hawnhekk huwa spiċċa jtenni li jekk dawn id-deċiżjonijiet ma jittieħdux hemm il-possibilità li l-Partit Nazzjonalista ma jibqax jeżisti.
Grech qal, “Jekk ma nieħdux id-deċiżjonijiet diffiċli u malajr, nirrisjkaw saħansitra s-sopravivenza tagħna bħala partit.”
Hawnhekk ħa l-okkażjoni li jbeżża’ lil kull min jista’ jkun imħajjar li jtellaqlu għat-tmexxija tal-partit u żvela pubblikament li l-Partit Nazzjonalista għandu 32 miljun ewro f’dejn u li għalhekk bħalissa l-partit m’għandux il-likwidità finanzjarja biex jagħmel kampanja għall-elezzjonijiet tal-Parlament Ewropew u tal-kunsilli lokali sentejn u nofs oħra.
Hu qal, “Għandna 32 miljun ewro dejn, dik hija r-realtà li għandna quddiemna.”
Wara kampanja sħiħa ta’, Grech jippruvaw igiddbu lil ONE News meta jirrappurtaw dwar il-problemi finanzjarji u l-ġlied intern, Bernard Grech ammetta li l-Partit Nazzjonalista huwa maqsum wisq.
Dan filwaqt li bil-problemi li beda jsemmi ried jaqta’ qalb lil min jista’ joħroġlu għan-nofs.
Bernard Grech qal, “Nitlobkom biex tpoġġu l-fiduċja tagħkom fija. Ma nistgħux le naffordjaw li noħolqu aktar firdiet f’partit li diġà huwa fframmentat wisq.”
Huwa kompla jikxef kif hemm min qed inawwar il-Partit Nazzjonalista minn ġewwa.
Il-Kap tal-Partit Nazzjonalista qal, “Ma nistgħux taparsi nkunu qegħdin naħdmu flimkien imbgħad innawru. Tħallu lil ħadd ikompli jipprova jkisser minn ebda naħa.”
Huwa temm diskorsu jgħid kif ser ikun hemm nies li jweġġgħu fil-partit iżda dawn, għal ġid tal-Partit, skont Bernard Grech għandhom iżommu kollox mistur u jbatu fis-skiet.
Hu qal, “Meta ngħidu ħadd m’hu akbar mill-partit ifisser li jekk hemm bżonn inweġġa’ jekk hemm bżonn inbati dik il-weġgħa, dik it-tbatija inżommha, u inżommha ġewwa, inżomma għalija, għall-ġid tal-partit.”
