Il-Partit Nazzjonalista qed jistenna l-eżitu mill-elezzjonijiet każwali li se jsiru biex jimtlew is-seba’ siġġijiet ta’ kandidati Nazzjonalisti li ġew eletti minn żewġ distretti, imbagħad jiġu eletti sitt Deputati nisa oħra bil-mekkaniżmu favur rappreżentanza iżjed ugwali fil-Parlament, qabel jiftaħ it-triq għal tellieqa tat-tmexxija tal-Partit Nazzjonalista.
Tellieqa li tista’ tkun waħda li fiha Bernard Grech itellaq waħdu hekk kif malli ħareġ ir-riżultat tal-elezzjoni ġenerali mar jiġri jgħid li se jfittex il-konferma biex jibqa’ Kap tal-Partit Nazzjonalista.
Mal-Maltatoday, il-President tal-Kumitat Eżekuttiv tal-Partit Nazzjonalista, Joseph Grech qal li l-ewwel irid jiġi kompost il-Grupp Parlamentari Nazzjonalista qabel jinħareġ pjan għat-tmexxija tal-Partit Nazzjonalista.
Grech, li wkoll kien kandidat f’din l-elezzjoni ġenerali u sa issa baqa’ l-art, saħaq li għad iridu jiġu eletti 13-il Deputat Nazzjonalista li mbagħad ikollhom dritt tal-vot fl-Eżekuttiv li se jiddeċiedi dwar it-triq għal elezzjoni ta’ Kap u Viċi Kapijiet tal-Partit Nazzjonalista.
Sorsi fid-Dar Ċentrali qalu lil ONE News li d-Deputati tal-Blue Heroes eletti bħal Beppe Fenech Adami u Chris Said qed jaraw li l-ewwel jippruvaw jiġu eletti sħabhom oħra Blue Heroes fl-elezzjonijiet każwali qabel ma jimmuntaw triq fl-elezzjoni jew konferma ta’ Kap tal-Partit Nazzjonalista.
Jason Azzopardi, il-perċimess tal-Blue Heroes u Karol Aquilina, ħu l-President tal-Għaqda Repubblika, tefgħu isimhom għall-elezzjonijiet każwali bit-tama li jsibu ruħhom fil-Parlament.
Aquilina jidher li għandu ċans tajjeb li jerġa’ jitla’.
Sadanittant għadu mhux magħruf x’se jiġri biż-żewġ Viċi Kapijiet David Agius u Robert Arrigo, li fl-aħħar elezzjoni ġenerali tal-ewwel tela’ biss minn distrett wieħed filwaqt li l-ieħor qabżu Joe Giglio.
Dan filwaqt li Bernard Grech jidher li jrid jibqa’ Kap tal-Partit Nazzjonalista li ġarrab l-akbar telfa fl-istorja elettorali mill-Indipendenza ’l hawn.
Sa issa, l-aħħar Kap ta’ partit li kien tellaq waħdu f’elezzjoni kien Lawrence Gonzi fi żmien l-inkwiet ma’ Franco Debono fl-2012.
Intant Bernard Grech irid itellaq waħdu anki jekk analisti differenti fosthom ġurnalisti analitiċi u b’esperjenza kbira u eks Ministru Nazzjonalista kritikaw it-tmexxija fjakka ta’ Bernard Grech u wħud talbu lil Grech jaħsibha sew u jwarrab.
