Wara biss ħamest ijiem Bernard Grech għamel l-ewwel passi lura mill-wegħda li l-ebda bini fuq żoni barra l-iżvilupp ma jista’ jsir jekk hux b’vot favur ta’ żewġ terzi tal-Parlament.
F’intervista li l-ġurnalist ta’ ONE News Colin Deguara għamel lil Kap tal-Partit Nazzjonalista Bernard Grech il-Ħadd filgħodu, l-ġurnalist kkwota kelma b’kelma d-diskors li bih Grech għamel din il-wegħda.
Meta kien mistoqsi: “Inti kont kategoriku u għidt dan il-kliem: “Jinbidel biss u jsir żvilupp biss barra l-iżvilupp b’vot b’żewġ terzi fil-parlament.” Allura bidwi li jrid kamra tal-għodda, bidwi li jrid biċċa ċangatura, trejqa, dan ukoll jrid jitla’ l-parlament?”
Bernard Grech wieġeb: “Jiena Colin bħala inti ġurnalist u anke avukat ma kontx nistenna li inti anke temmen, vera qiegħed mal-ONE imma mhux temmen in-narrattiva tal-ONE.”
Il-Ġurnalist sostna: “Le dan x’għidt inti.”
Grech spiċċa jmeri s-sewwa magħruf u qal li t-Tlieta f’attività politika huwa ma kienx qal hekk iżda kien speċifika li din il-wegħda tapplika biss għall-proġetti massiċċi.
Madankollu filmati tad-diskors tiegħu dakinhar juru mod ieħor. Grech kien qal, “Jinbidel biss u jsir żvilupp biss barra l-iżvilupp b’vot b’żewġ terzi fil-Parlament.”
Bħal ma ħawwad fuq l-ODZ, ħawwad ukoll fuq il-fast ferry bejn Malta u Għawdex.
Wara li kien wiegħed li jibda jwaqqaf il-Fast Ferry ta’ bejn Malta u Għawdex, f’Baħar iċ-Ċagħaq, issa wieġeb hekk.
Meta kien mistoqsi: “Ġieli użajtu s-servizz tal-fast ferry Dr. Grech?”
Bernard Grech stqarr: “Iva użajtu darba.”
Meta reġa’ kien mistoqsi: Qed ngħidlek għaliex kont proponejt li dan jibda jieqaf Baħar iċ-Ċagħaq u naħseb tifhem li jekk tibda twaqqfu Baħar iċ-Ċagħaq il-fast ferry ma jibqa’ fast xejn le?”
Bernard Grech tenna: “Naħseb hawnhekk fejn ma tkunux qegħdin forsi ssegwu sew dak li qegħdin ngħidu.”
Kien il-Partit Nazzjonalista stess li kien wiegħed li jagħmel waqfa oħra għall-fast ferry f’Baħar iċ-Ċagħaq.
Lura f’April ONE News kien staqsa lil Bernard Grech dwar din il-waqfa tal-Fast Ferry f’Baħar iċ-Ċagħaq madankollu dak iż-żmien Grech kien ukoll ħalliena bla dettalji.
Huwa qal, “Għadni kif spjegajtlek…”
Iżda l-Ġurnalist reġa’ staqsieh: “Le għadek ma spjegajtlix jekk dan hux ser ikun l-istess Ferry li jieqaf il-Belt?
Grech kompla jgħid: “ Għandna aktar anke inizjattivi. M’iniex ser ngħidlek aktar dettalji. Dawk id-dettalji ser ikunu qed joħorġu għaliex bil-programm elettorali ser inkunu qiegħdin nagħtu aktar dettalji ta’ dak li ser inkunu qed nagħmlu.”
