Isteriku, negattiv u diviżiv.
Hekk kien l-ewwel diskors tal-Kap Nazzjonalista Bernard Grech f’kampanja elettorali.
Diskors li fih Bernard Grech irrikorra għall-għajjat u t-tixjir tal-idejn.
Qal, “About Time.”
Huwa saħansitra lissen kliem kontra il-Laburisti u dak kollu li għandu x’jaqsam mal-Partit Laburista.
B’diskors li jiżra’ l-mibegħda huwa ddeskriva lil-Laburisti bħala nies vili li qatt ma jinbidlu.
Qal, “Sod quddiem il-gideb tal-Laburist. X’viltà ta’ nies. Kont qiegħed nagħmel house visit fin-naħa ta’ isfel ta’ Malta wara l-mina. Dak illi jagħmlu dawn il-Labour fil-Gvern. Dejjem hekk kienu u dejjem hekk jibqgħu.”
U f’diskors sinonimu ma’ Simon Busuttil, Bernard Grech saħansitra spiċċa jsemmih u jiddefendih.
Qal, “Eh, ara kemm attakkawħ lil Simon Busuttil.”
Dwar il-Gvern, li kien ta’ spalla għall-familji Maltin u Għawdxin tul pandemija, il-Kap Nazzjonalista Bernard Grech baqa’ negattiv.
Qal, “Dawn qegħdin iberbqu l-flus fil-ħela.”
Il-Kap tal-Partit li fi żmien ta’ sfida kien tefa’ l-piżijiet fuq in-nies bil-qalb, spiċċa jgħajjar dan il-Gvern li se jibgħat ċekk addizzjonali għall-irkupru mill-pandemija.
Qal, “Imbagħad bil-wiċċ tost kollu jiġi jferfer iċ-ċekk biex jgħidilna li ser nibgħatilkom mitt ewro.”
Huwa kkritika lil Gvern ukoll għaliex fi żmien meta d-dinja intlaqtet minn pandemija għażel li jwieżen lill-familji Maltin u Għawdxin.
Filwaqt li r-rata ta’ dejn ta’ pajjiżna hija fost l-inqas fl-Ewropa, hekk kif ħerġin minn żmien ta’ sfida, Bernard Grech kien jippreferi jitfa’ l-piż fuq in-nies.
Qal, “Imma mhux tiddependi biss fuq self.”
Il-kap Nazzjonalista li fl-aħħar jiem rajnieh iqabbel l-ekonomija tal-pajjiż ma’ logħba Monopoly u lil pajjiżna ma’ lukanda ħażina, issa sab il-ħin ukoll jitkellem fuq il-programmi televiżivi li kien jara fuq l-istazzjonijiet Taljani.
Qal, “Inkredibbli hux, bit-taljan meta kont żgħir fuq il-Canale 5 kont nara ‘Inkredibile ma Vero’. Veru, veru, veru.”
Ma setax jonqos li dak li fil-Parlament kien qal li hu gladjatur u li fuq it-televiżjoni kien qal li jistħajlu Rocky, issa fil-pjazza tal-Mosta nfexx jgħajjat.
Qal, “Qaltli, qaltli kuraġġ. Għidtilha jien kuraġġ għandi kemm trid għaliex nafu li qegħdin fuq in-naħa t-tajba tal-istorja.”
F’diskors twil ma naqasx li Bernard Grech baqa’ jgħajjat biex isir Prim Ministru mingħajr ma lissen il-viżjoni tiegħu għall-pajjiż.
