Ħafna jaraw il-Belt bħala l-post ċentrali tal-kummerċ, għal xi mawra kulturali jew għall-ħin ta’ rilassament, imma għal ftit aktar minn sitt elef persuna, il-Belt Valletta hija darhom.
Magħrufin bħala tal-Palestina, tal-Iljun jew tas-City; li hu żgur li kull min hu Belti huwa kburi jgħid li huwa mill-kapitali.
Tony Polidano, li jsejjaħ lilu nnifsu Vallettan, qal li huwa twieled il-Belt u fi tnejn u sebgħin sena, qatt ma fittex biex jgħix f’postijiet oħra.
Huwa stqarr: “Proud ħafna li jiena ngħix ġol-Belt Valletta, jien anke meta nsiefer u jgħiduli minn fejn int, jien ngħidilhom minn Valletta, però mbagħad Valletta fejn, ngħidilhom Malta.”
L-istess tenniet Doris Montfort li l-Belt għaliha tinsab f’qalbha: “L-identità li aħna fil-Belt kapitali inħossuna kburin għax għandna dik l-espressjoni, jgħidulek minn fejn inti, ngħidilhom mill-Belt għall-grazzja t’Alla. Allura l-Belt għalina ġawhra u ma niċħduha qatt il-Belt tagħna.”
Dawn iż-żewġ Beltin huma attivi ferm fil-komunità Beltija u jqisu l-proġett Ħiliet il-Komunità, bħala pjattaforma tajba biex tissaħħaħ din il-komunità.
Tony tenna: “Imma jekk tkun tħobb il-Belt tara x’se tagħmel biex inti dejjem il-Belt tkun minn ta’ quddiem, mhux qabel pajjiżi oħra ta, jien ma nħobbx indaħħal piki, imma tkun isbaħ u tkun aktar attiva, ġenerazzjoni dejjem sabiħa. It-tfal ittellagħhom minn ċkunithom, għax imbagħad oħra, il-ġenituri jridu jtellugħhom hekk kif tellgħuna l-ġenituri tagħna.”
U għalhekk dan il-proġett mistenni jagħti ċ-ċans lill-komunità biex terġa’ tikber fil-Belt li tant iħobbu.
Doris sostniet: “Għall-ewwel li żżewwiġt ma sibtx post il-Belt u krejna Birkirkara, però kemm kont immur innaddaf biss għax kont nerġa’ ninżel għand id-daddy, jiġifieri qatt ma qgħadt hemmhekk. Imbagħad il-Bambin ipprovdieli post il-Belt u tista’ taħseb kemm jien ferħana li ngħix il-Belt. Jien għandi żewġt itfal joqogħdu barra l-Belt, tgħidx kemm huma ddispjaċuti.”
