- Il-Prim Ministru jitkellem dwar l-investiment ta’ Barts f’Għawdex
Fiċ-Ċentru Laburista tax-Xagħra, il-Prim Ministru qal li Għawdex qed jinbidel, biex minn qasam tas-saħħa li kien piż, issa se jkun fost l-aqwa fil-Mediterran. Settur li se jġib ix-xogħol, fi gżira fejn qed tkun indirizzata l-problema ta’ staġjonalità.
Elf student diġa huma interessati li jieħdu sehem fil-proġett ta’ suċċess, il-proġett tal-iskola medika f’Għawdex.
“Din hija storja simbolu tad-differenza bejn dan il-Gvern u l-Gvern ta’ qablu” qal il-Prim Ministru. Spjega li dan il-Gvern huwa ambizzjuż u l-Għawdxin se jieħdu l-aqwa kura fil-pajjiż, f’Għawdex stess. Se jiġu barranin jieħdu l-kura f’Għawdex, u jiġu aktar postijiet tax-xogħol. Differenza qawwija mill-istat li kien fih il-qasam mediku taħt amministrazzjoni Nazzjonalista.
L-istess nies li llum jinsabu fl-Oppożizzjoni u li qed jopponu l-proġett tal-enerġija f’pajjiżna. Li tant qed tgħid li hemm ħabi ta’ kuntratti. “Aħna niddiskutuhom dawn il-kuntratti għax jagħmlu unur għal pajjiżna. Minn xhiex għandna nistħu? Li ħa nibdnu sptar ġdid? Li se nġibu x-xogħol?” staqsa l-Prim Ministru.
Innota li jekk xi ħadd fil-Paralament jistaqsi biex jippublika l-kuntratt tal-lotteriji f’pajjiżna, jew dak tal-Malta International Airport, jew dak tal-Liquigas, li lkoll kienu ffirmati mill-Oppożizzjoni meta kienet fil-Gvern, isib li ma jistax għax kien intlaħaq ftehim biex dawn ma jkunux ippublikati.
Il-Prim Ministru kwota lill-Professur Albert Fenech, sa ftit tax-xhur ilu kelliem għall-Oppożizzjoni fil-qasam tas-saħħa, li qal li kieku kien hemm xi ħaġa maħmuġa, żgur li ma kienx se jkun parti mill-proġett tal-Vitals f’pajjiżna.
Kwota kemm-il pjan u rapport li qalu li s-setturi tal-edukazzjoni u s-saħħa kellhom bżonn ikunu indirizzati – dan il-Gvern ħadhom minn fuq l-ixkaffa u beda jwettaqhom biex jiżgura mijjiet ta’ postijiet tax-xogħol għall-ħamsin sena li ġejjin f’Għawdex. “B’deċiżjoni waħda ulied l-Għawdxin se jkollhom xogħol għas-snin li ġejjin” qal il-Prim Ministru, filwaqt li semma l-suq tal-propjetà, il-prodott Għawdxi, il-lukandi Għawdxin li se jaraw titjib. Esprima kunfidenza li se jkun hemm aktar investiment f’Għawdex, ladarba dak ta’ Barts ikun suċċess.
Joseph Muscat ta ħarsa lejn dak li qed jiġri lil hinn minn xtutna, fejn il-prezz taż-żejt żdied b’9%, u f’ġimgħa żdied bi 13%. Li kieku bqajna bis-sistema li rieduna ta’ qabilna, spjega l-Prim Ministru, mix-xahar id-dieħel kien ikollhom jogħlew il-kontijiet tad-dawl u tal-ilma. B’kuntrast għal ħafna pajjiżi oħra, il-Maltin u Għawdxin moħħhom mistrieħa li l-kontijiet huma rħas u se jibqgħu rħas kif inhuma. Tkellem fuq l-importanza tal-istabilità fil-prezzijiet.
“Dan huwa Gvern li jibqa’ Gvern ta’ bidla” qal il-Prim Ministru, li żied jgħid li jirrispetta l-istutuzzjonijiet imma mhux parti mill-establishment. Hawn irrefera għall-istandards doppji li tadotta l-Oppożizzjoni, li tirrispetta lill-ogħla awtoritajiet biss meta jaqbel lilha. Bħal per eżempju, kull darba li l-iSpeaker tal-Kamra tar-Rappreżentanti jaqta’ ruling li ma jkunx favur l-Oppożizzjoni, ma jaċċettawhx.
“Il-poplu jaf aktar minn hekk” qal Muscat. Żied li meta jiġi biex jiddeċiedi fl-2018, il-poplu se jkun qed jagħti tweġiba fuq tliet mistoqisjiet: illum is-sitwazzjoni tiegħu bħala familja jew negozju hija aħjar? Il-pajjiż kollu kemm hu, huwa aħjar minn kif kien? U jekk jerġa jkun hemm dan il-Gvern, is-sitwazzjoni se tkun aħjar? “It-tweġiba għal ħafna hija iva, u għalhekk irridu nkomplu naħdmu” temm jgħid il-Prim Ministru f’Għawdex.
