Il-kelliem għall-ekonomija tal-Partit Nazzjonalista, Ivan J Bartolo, ħareġ b’attakk aħrax fuq inizjattivi tal-gvern maħsuba biex jgħinu lin-nies.
Saħansitra qal li l-ftehim li żied il-paga minima kien xi ħaġa li n-negozjati belugħa.
Bħal ma skont hu belgħu ż-żieda għall-għoli tal-ħajja.
Għalhekk tenna li wieħed ma jista’ jippretendi xejn mingħand in-negozjanti.
Bartolo għamel dawn id-dikjarazzjonijiet fl-Isla meta tkellem qabel il-Kap tal-Partit Nazzjonalista, Bernard Grech.
Qal, “In-negozjant għadu kif bela’ 12.81 COLA. Għadu kemm bela, x’inhi? Għiduli… il-minimum wage.”
Dan l-argument użah bħala bażi biex attakka inizjattiva tal-Ministru għall-Ekonomija li qed jitkellem ma’ importaturi u sidien ta’ supermarkets ewlenin biex il-gvern ikollu stampa reali tas-sitwazzjoni, u eventwalment jittieħdu l-miżuri li hemm bżonn. Imma għal Bartolo dan mhux aċċettabbli.
Stqarr, “L-Onor Silvio Schembri qed iħabbat bieb bieb, qed jitkellem man-negozjanti li jimportaw l-ikel, għax qed jieħu inizjattiva biex jara kif se jraħħas il-ħajja. Ma tistax toħroġ hemm barra u lin-negozjant tgħidlu ara x’se tgħamel ħa traħħas il-prezzijiet. Mela waqt li kollox qed jgħola, qed ngħidulu raħħas il-prezzijiet.”
Dawn id-dikjarazzjonijiet saru fl-istess ħin li għajnuniet li l-gvern jagħti f’setturi kruċjali bħal dak tal-enerġija, inkluż lin-negozji, l-Oppożizzjoni titkellem kontra tagħhom u tgħid li mhumiex sostenibbli.
Għalih is-soluzzjoni hija l-PN, iżda għal Ivan Bartolo l-oppożizzjoni qed taħdem kontra monstru.
Qal, “Peró qed naħdmu kontra monstru. M’hemmx dubju li qed naħdmu kontra monstru.”
U filwaqt li l-gvern sejjaħlu mostru, qal li għalih kien kastig jisma d-diskors tal-Prim Ministru fir-replika tal-budget.
Stqarr, “Jiena kont hemm ovvjament. Jien għalija kastig dak li tagħmel sagħtejn hemm tisma’ l-qrid, kastig.”
Minn kliemu, jgħoġbu iktar id-diskors tal-Kap tal-Oppożizzjoni.
Qal, “Il-Kap jinħanaq kull darba li jkollu ċans jitkellem.”
U l-Ħadd filgħodu l-Kap tal-Oppożizzjoni reġa’ nħanaq jattakka dak kollu li għamel il-gvern filwaqt li reġa’ żbalja l-fatti bażiċi dwar l-edukazzjoni bħal kemm huma s-salarji tal-ħaddiema u kemm hemm studenti fil-klassi.
Hu ukoll tkellem dwar iż-żieda li għandhom jingħataw l-għalliema, u semma li din iż-żieda għandha tingħata wkoll għax l-għalliema huma kostretti li jsifru fil-high season.
Stqarr, “L-edukatur meta jmur biex jieħu vaganza isib il-high season dejjem.”
Tkellmet ukoll il-kandidat għall-Parlament Ewropew, Louisanne Pulis, li fl-aħħar tad-diskors lin-nazzjonalisti qaltilom hekk.
Qalet, “Jien għamilt resume. Jekk ikollna nagħmlu ġurnata ma sservinix. U wara dan il-qrid kollu u forsi ħaddieħor jgħid negattivita. Insaqsu, x’inhu l-pern ta’ dan kollu?”
