F’partita li ntagħbet quddiem attendenza ferm miżera, Balzan għelbu lil Melita, bl-iskor ta’ 3-1, bit-tliet goals għalihom jaslu fit-tieni taqsima. B’hekk huma rritornaw għar-rebħ wara xejn inqas minn tmien partiti konsekuttivi mingħajr rebħa.
Min-naħa l-oħra din kienet ir-raba’ telfa konsekuttiva għal Melita, u s-seba’ waħda infila għalihom mingħajr rebħa.
Kienet partita wkoll kemmxejn nervuża fejn ġew innutati xejn inqas minn seba’ ammonizzjonijiet – tlieta għal Balzan u erbgħa għal Melita.
Għal Balzan irritorna minn sospensjoni il-captain Samir Arab wara li serva logħba sospensjoni, waqt li għal Melita rritorna fl-azzjoni il-player Gareth Barone ukoll wara li kien sospiż.
Dan filwaqt li għal dawn tal-aħħar irritorna jiddefendi l-lasti il-goalkeeper Pollakk Aleksander Andrzej Lubik wara li fl-aħħar żewġ logħbiet konsekuttivi kontra Marsaxlokk u Hibernians rispettivament kien iż-żagħżugħ Gosef Mizzi li ġie utilizzat bħala goalkeeper.
Kienu Balzan li ħolqu l-ewwel periklu fil-21 minuta meta Victor Blasco Llorens xeħet cross għan-nofs iżda ħadd mill-players sħabu ma rnexxielu jagħmel kuntatt mal-ballun, bl-azzjoni tisfuma fix-xejn.
Melita wieġbu fis-37 minuta meta wara li rċieva minn freekick ta’ Alan Borg Olivier, Gareth Barone, kellu d-daqqa ta’ ras b’lura tiegħu salvata f’corner b’diffikultá mill-goalkeeper Serb ta’ Balzan, Danilo Golovic.
Fil-ftuħ tat-tieni taqsima, Balzan ħarġu ferm aggressivi u fid-49 minuta Dimeji Awsoanya għadda tajjeb lejn Victor Blasco Llorens li minn qagħda ideali spara għoli.
Huma komplew jippressaw u meritatament fetħu l-iskor minuta biss wara meta Rafael Floro Da Silva xeħet cross fil-baxx li sab lil ALEXANDER AYO AKPAN li antiċipa lid-difensur dirett tiegħu u permezz ta’ konklużjoni mill-viċin ma ħafirx biex b’hekk skorja l-11-il goal tiegħu matul dan l-istaġun.
Madankollu, huma bilkemm kellhom ċans jifirħu għal dan il-goal li fis-57 minuta, Melita ġabu l-iskor indaqs meta ALDAIR PENA SIMANCA approfitta minn indeċiżjoni grassa ta’ Golovic li ħarablu l-ballun minn idejh, u minn taħt il-lasta b’logħob tat-tfal tefa’ ġewwa.
Dan il-goal provda injezzjoni morali lil Melita u mas-siegħa logħob freekick b’saħħtu iżda ċentrali ta’ Gareth Barone ġie salvat f’corner minn Golovic bi bravura, biex patta bis-sħiħ għall-iżball li wettaq proprju ftit qabel fl-azzjoni li wasslet għall-goal tad-draw ta’ Melita.
Balzan wieġbu fit-62 minuta meta Victor Blasco Llorens kellu x-xutt tieghu mill-viċin salvat f’corner minn Lubik.
Huma komplew jipproduċu l-isbaħ logħob u meritatament fis-76 minuta, skorjaw il-goal tar-rebħa permezz ta’ DIMEJI AWOSANYA li permezz ta’ xutt angolat fil-baxx jintemm fir-rokna tax-xibka, bil-ballun jaħbat ma’ sieq il-wieqfa qabel intemm ġewwa.
Żewġ minuti biss wara, Balzan, kellhom f’saqajhom il-ballun tat-tielet goal, iżda Akpan kellu x-xutt tiegħu minn ġol-kaxxa jintemm ftit barra.
Fil-ħin miżjud huma ssiġillaw ir-rebħa permezz tat-tielet goal meta Jan Busuttil provda l-assist lil DIMEJI AWOSANJA li avvanza tajjeb fil-kaxxa u permezz ta’ xutt fil-baxx tefa’ ġewwa, biex b’hekk irreġistra doppjetta personali.
Huma komplew jamministraw il-vantaġġ minimu li kellhom sa tmiem il-partita, biex b’hekk kisbu tliet punti prezzjużi.
Referee: Glen Tonna
Plejer tal-Logħba: Alexander Ayo Akpan (Balzan FC)
