Mhux l-ewwel darba li kultant wieħed ikun qed ifittex ktieb li jkun miktub fuq il-ħajja tal-lum u l-Awtur Lon Kirkop wieġeb proprju għal din it-talba.
Dan hekk kif permezz tal-ewwel ktieb tiegħu ‘Mitt Elf Isem Ieħor: HappyVeganGirlJules’, li huwa wkoll ir-rebbieħ tal-Premju tal-Letteratura għaż-Żgħażagħ 2020, idewwaq lill-qarrejja rakkont ta’ żewġ karattri li jgħixu fuq naħat differenti tal-iscreen.
Ir-rumanz jiffoka fuq Manda u Julia fejn waħda tgħix ħajjitha quddiem l-iscreen taqsam ħajjitha li tpenġiha bħala waħda perfetta mad-dinja kollha filwaqt li l-oħra tikkonsma dak li tara hekk kif tixtieq tkun bħal dik li qed issegwi.
Lil Manda, id-dinja reali ħaditilha kollox filwaqt li d-dinja diġitali tatha lil Julia, Jules. Kulħadd jaħsibha li hi qed tipprova tkun bħal Jules, “Imma mhux vera, jien ma nixtieqx inkun bħal Jules. Jien nixtieq inkun Jules. Nixtieq li kulħadd flok isejjaħli Manda, jibda jsejjaħli Julia, Jules jew b’mitt elf isem ieħor.”
Kull min jixtieq jaqra dan ir-rumanz b’differenza jista’ jixtri kopja mingħand Merlin Publishers jew anke jixtri l-kopja tiegħu online: https://merlinpublishers.com/product/mitt-elf-isem-iehor-happyvegangirljules/
