Fit-2 ta’ Mejju 2017, l-għada li l-Kummissjoni Elettorali ppubblikat ir-Writ tal-Elezzjoni Ġenerali tat-3 ta’ Ġunju, 2017 fil-Gazzetta tal-Gvern, ħarġet sejħa għall-applikazzjonijiet mingħand persuni eliġibbli sabiex iservu bħala Assistenti Kummissjonarji Elettorali, jew bħala persuni li jgħoddu, persuni li jissorveljaw u persuni li jikkalkolaw għal waqt l-għadd tal-voti fl-Elezzjoni Ġenerali.
L-applikazzjonijiet waslu għand il-Kummissjoni personalment minn individwi biex iservu f’isem il-Kummissjoni stess. Il-Partiti Politiċi li qed jikkontestaw l-Elezzjoni, ukoll issottomettew lista ta’ persuni biex jirrappreżentawhom waqt l-Elezzjoni.
Apparti l-applikazzjonijiet ta’ persuni biex jgħoddu, jissorveljaw u jikkalkolaw għal waqt l-għadd tal-voti, l-Kummissjoni rċeviet ukoll 4169 applikazzjoni għall-karigi ta’ Polling Place Officers, Chairpersons, Assistenti Kummissjonarji u Riservi. Għal dawn il-karigi, b’random run, ntagħżlu 2570 persuna f’isem il-Kummissjoni Elettorali u 1,815 f’isem il-Partiti Politiċi.
F’kull kamra tal-votazzjoni se jkun hemm żewġ rappreżentanti tal-Kummissjoni, wieħed minnhom maħtur bħala Chairperson, flimkien ma’ oħrajn tal-Partiti Politiċi, sakemm dawn tal-aħħar issottomettew biżżejjed applikazzjonijiet biex ikollhom rappreżentant f’kull Kamra tal-votazzjoni. Se jkun hemm 688 Kamra tal-votazzjoni f’Malta u Għawdex
Hi l-Kummissjoni li taħtar lil dawn il-persuni u għaldaqstant il-lealtà tagħhom għandha tkun lejn il-Kummissjoni Elettorali u li kulħadd hu obbligat li jsegwi l-istruzzjonijiet kollha tagħha, kemm dawk stabbiliti minn qabel, kif ukoll dawk li l-Kummissjoni tista’ toħroġ minn ħin għall-ieħor, anke matul il-jiem tal-votazzjoni. Kull min hu maħtur irid ikun dispost li jattendi sessjonijiet ta’ struzzjonijiet mill-Kummissjoni, li qed torganizza erba’ sessjonijiet, waħda f’Għawdex li saret it-Tlieta, 23 ta’ Mejju, u tlieta Malta, l-Erbgħa, l-Ħamis u l-Ġimgħa, 24, 25 u 26 ta’ Mejju.
Is-sessjoni f’Għawdex, saret fil-Kulleġġ fir-Rabat u għaliha attendew 250 persuna residenti fuq din il-gżira u li se jservu Malta. Żewġ sessjonijiet oħra f’Malta fl-MFCC (Malta Fairs Convention Centra) Ta’ Qali u għalihom attendew 3484 persuna li se jservu fuq iż-żewġ gżejjer. Għal dawn it-tliet sessjonijiet attendew dawk il-persuni li se jservu bħala Chairpersons, Assistenti Kummissjonarji u Riservi.
Is-sessjoni li se ssir nhar il-Ġimgħa, 26 ta’ Mejju, f’Dar il-Mediterran, il-Belt se jattendu 119-il persuna maħtura bħala Polling Place Officers u Riservi għal din il-kariga.
Dawn is-sessjonijiet qed jitmexxew mill-Kummissjoni Elettorali u impjegati tal-Uffiċċju Elettorali. Il-persuni maħtura rċevew minn jiem qabel Ktejjeb tal-Istruzzjonijiet biex iservi ta’ gwida għad-doveri tagħhom. Fi tmiem is-sessjoni, huma se jingħataw l-identification tag maħruġa mill-Kummissjoni u huma għandhom jissottomettu l-formola ta’ aċċettazzjoni, formola ta’ ġurament jew dikjarazzjonji solenni u skeda tar-rotot tat-trasport, kollha ffirmati minnhom.
Il-persuni kollha maħtura bħala Polling Place Officers, Chairpersons, Assistenti Kummissjonarji u Riservi, għandhom jivvutaw BISS il-ĠIMGĦA, 2 ta’ ĠUNJU 2017 u f’ebda jum ieħor.
Dawn il-persuni se jservu matul l-erbat’ ijiem tal-votazzjoni li huma:
Is-Sibt, 27 ta’ Mejju Fid-Djar tax-Xjuħ li għandhom ’il fuq minn 50 resident – 29 Malta u waħda Għawdex, b’kollox 30, u f’San Vinċenz de Paule, u fil-Kumpless tal-Għadd tal-Voti n-Naxxar għal persuni li jkunu msiefra jew rikoverati f’xi sptar fit-3 ta’ Ġunju, u għall-Membri tal-Kummissjoni Elettorali
Il-Ħamis, 1 ta’ Ġunju Fl-Isptarijiet Mater Dei, Karin Grech, Mount Carmel u l-Ġenerali f’Għawdex
Il-Ġimgħa, 2 ta’ Ġunju Fil-Kumpless tal-Għadd in-Naxxar għall-Polling Place Officers, Chairpersons, Assistenti Kummissjonarji u Riservi li se jservu kemm f’Malta kif ukoll Għawdex.
Is-Sibt, 3 ta’ Ġunju Il-kumplament tal-eletturi l-oħra fid-diversi Postijiet tal-Votazzjoni kemm f’Malta kif ukoll Għawdex
Il-ħinijiet tal-votazzjoni fil-jiem u l-postijiet kollha msemmija,se jkunu mis-7.00 a.m. sal-10.00 p.m.
