Stqarrija maħruġa mill-Ministeru fl-Uffiċċju tal-Prim Ministru tgħid li Anne Fenech illum reġgħet għamlet tentattiv ieħor biex tagħmel il-bsaten fir-roti fil-process ta’ konsultazzjoni tal-Awtorità għall-Ambjent u r-Riżorsi, liema proċess ġie estiż b’talbiet li saru mill-Partit Nazzjonalista stess; dan biex jippruvaw iwaqqfu akkost ta’ kollox il-proġett tal-power station il-ġdida li se tkun qed taħdem bil-gass, b’dannu għal saħħet il-familji Maltin u Għawdxin.
Il-Partit Nazzjonalista kellu 40 ġurnata żmien biex iressaq il-kummenti u s-suġġerimenti tiegħu u għalhekk huwa diżgustanti li l-Oppożizzjoni qed tinżel f’livell baxx li pajjiżna qatt ma ra bħalu.
L-istqarrija tgħid li ta’ min ifakkar li dan huwa l-istess partit li meta kien fil-Gvern inqabad fl-akbar skandlu ta’ korruzzjoni fuq xiri taż-żejt, ħalla lill-familji Maltin u Għawdxin b’kontijiet fost l-aktar għoljin minn bosta pajjiżi Ewropej, l-istess nies li xtraw power station mill-YellowPages u li taħdem bl-aktar żejt li jniġġes, u li, għal raġunijet ovvji, qatt ma riedu jwettqu il-qalba mill-heavy fuel oil—l-aktar żejt li jniġġes—għall-gass.
“Dan l-att irresponsabbli jkompli jikkonferma kemm il-Partit Nazzjonalista huwa interessat biss li jġib l-interess partiġġjan tiegħu l-ewwel u qabel kollox,” qal il-Ministeru
B’kuntrast għal dan l-atteġjament, il-Gvern ser ikompli jaħdem biex pajjiżna jgawdi l-benefiċċji li l-qalba għall-gass minn heavyfuel oil mistennija ġġib f’pajjiżna, fl-istess waqt li r-roħs fil-kontijiet tad-dawl u l-ilma jibqa’ jkun sostenibbli għall-ġid tal-familji u n-negozji. L-Oppożizzjoni m’għandha l-ebda pjan konkret bħala alternattiva għal dan il-proġett.
Temm billi qal li ħadd ma jista’ jiċħad li dan il-proġett, meqjus bħala blueprint mill-Kummissjoni Ewropea, ser ifisser enerġija nadifa, affordabbli, u effiċjenti għal pajjiżna.
