Billi riesaq Ħadd il-Palm, id-Direttorat għas-Saħħa tal-Pjanti fi ħdan il-Ministeru għall-Iżvilupp Sostenibbli, l-Ambjent u Tibdil fil-Klima fi stqarrija spjega dwar l-importantanza li jiġi żgurat li l-friegħi tal-palm li jintużaw għal skop ornamentali assoċjat ma’ din il-festa jkunu ħielsa minn kwalunkwe sintomu tal-bumunqar l-aħmar tal-palm.
Qed jiġi enfasizzat li jittieħdu biss friegħi mis-siġra u mhux mill-qliebi. Is-siġar tal-palm li minnhom isir iż-żbir tal-friegħi għandhom jiġu mbexxa b’pestiċidi adattati għal wara ż-żabra skont il-linji gwida li jinsabu fuq il-website tad-Direttorat.
Id-Direttorat tas-saħħa spjega li dan it-trattament għandu jiġi repetut għal tliet darbiet konsekuttivi biex jiġu protetti bl-aħjar mod possibbli s-siġar tal-palm. Il-friegħi għandhom jiġu maqtugħa żgħar kemm jista’ jkun sabiex jitnaqqsu l-partijiet infettati li ġeneralment ikunu konċentrati fil-parti ta’ isfel tal-fergħa.
Il-bażi minn fejn tkun inqatgħet il-fergħa għandha tiġi miżbugħa b’żebgħa apposta minħabba li l-bumunqar l-aħmar tal-palm jiġi attirat minn dan il-qtugħ frisk sabiex jiddepożita l-bajd.
Sabiex jiġi kontrollat dan il-mard, id-Direttorat għas-Saħħa tal-Pjanti ħeġġeġ għall-kooperazzjoni tal-pubbliku f’dawn l-attivitajiet ħalli drawwiet simili jitkomplew minn ġenerazzjonijiet futuri.
Għal aktar informazzjoni u gwida wieħed għandu jikkuntattja lill-customer care fi ħdan id-Direttorat għas-Saħħa tal-Pjanti fuq 22926535 jew fuq freephone 80072310.
