https://www.youtube.com/watch?v=RhDCo0N4jAg
Isem pajjiżna ssemma fl-istazzjon spazjali f’taħdita bejn l-astronawti.
F’recording ta’ messaġġi li kiseb ONE News tinstema’ konverżazzjoni bejn astronawta li jinsab fl-istazzjon spazjali u l-kamra tal-kontroll fuq id-dinja.
L-astronawta Franċiż Thomas Pesquet innota l-preżenza tal-kaxxa Maltija li qed tagħmel dan l-esperiment.
“It’s good to see those new players in space Malta and others, so congratulations to them for their cubesets and moving to port”, qal l-astronawta Franċiż.
L-astronawta Franċiż, li jagħmel parti mill-Aġenzija Ewropea tal-Ispazju, wera filmat minn fuq l-istazzjon spazjali bil-kampjuni Maltin jidhru f’idejh waqt l-esperiment.
Fuq Twitter huwa nnota wkoll kif il-kampjun fih eluf ta’ tpinġijiet minn tfal Maltin li ttellgħu fl-istess kaxxa.
Aktar tard kien ippubblikat ukoll ritratt mill-istess stazzjon ta’ pajjiżna matul il-lejl hekk kif l-istazzjon spazjali internazzjonali kien qed jorbita minn fuq pajjiżna.
Dan kollu jorbot mal-proġett Maleth li qiegħed jistudja ċ-ċelloli tal-ulċeri tas-saqajn ta’ persuni bid-dijabete. L-esperiment qiegħed jistudja l-effetti tal-kundizzjonijiet fl-ispazju fuq dawn iċ-ċelloli.
Il-kampjuni mistennija jaslu lura fuq wiċċ id-dinja fil-ġimgħat li ġejjin għal aktar studji fuqhom, biex tkun intemmet l-ewwel missjoni spazjali bis-sehem tal-Maltin.
