F’konferenza tal-aħbarijiet li saret l-erbgħa wara nofs-in nhar il-president tal-ASA Karl Izzo elenka bosta proġetti u attivitajiet għal matul ix-xhur li ġejjin bil-għan li jitqajjem dejjem aktar l-għarfien fl-isport akkwatiku. Fi kliem il-president tal-ASA Karl Izzo qal li wasal iż-żmien sabiex mid-diskors ngħaddu għal fatti.
ENEMED Water Polo Cup 2024
Għal sena oħra l-ASA ser terġa torganizza l-ENEMED CUP bil-programm kollu se jintlagħab ġewwa il-Pixxina Nazzjonali. Kompetizzjoni li se sservi wkol ta’ pjattaforma għat-talent żagħżugħ ġewwa pajjiżna. Fuq is-settur taż-żgħażagħ, Karl Izzo qal li bħalissa hemm madwar 16 il-player tal-water polo li qegħdin jilgħabu barra minn Malta fosthom 4 tfajliet. L-ASA hija kburija għal dawn l-opportunitajiet li qed ikollhom l-atleti tagħna għax dan kollu jawgura tajjeb għal ġejjieni.
Len Challenger Water Polo Cup – Men & Women
Din is-sena ġie deċiż li l-ASA tieħu sehem ukoll fiċ-Challenger Water Polo Cup b`selezzjoni ta` tim tan-nazzjonal immexxi mill-kowċ Milan Cirovic taħt l-isem Valletta Malta. It-tim ilu għal dawn l-aħħar ġimgħat jittrenja ġewwa il-Pixxina tal-Kottonera kemm filgħodu u anke filgħaxija. Il-preparamenti għaddejin ġmielhom. Il-grupp ta` kwalifikazzjoni li hemm fih Malta, ser isir ġewwa pajjizna din il-ġimgha bejn 19-22 ta` Ottubru 2023. Fost it-timijiet li ser nospitaw ser ikun hawn rappreżentanza mil-Litwanja, Finlandja u Bulgaria. Dan il-logħob ser iservi ta` preparazzjoni li ser ikollna fil-kampjonati Ewropej li kellhom isiru ġewwa Israel f`Jannar li ġej. F`din il-kompetizzjoni apparti it-tim tal-irgiel, ser ikollna wkoll rappreżentanza femminili għaliex bi pjaċir inħabbru li t-tim tat-tfajliet tas-Sirens ser jieħdu sehem ukoll f`din il-kompetizzjoni. Il-logħob ta kwalifikazzjoni tagħhom ser isiru ġewwa Burgas il-Bulgarija, u fil-grupp ser ikun hemm timijiet mir-Renju Unit, Bulgaria, Portugal u Serbia. Il-girls ilhom jippreparaw matul dawn l-aħħar ġimgħat għal dawn il-logħob.
Water Polo Youth & Women League
Kienet ilha tinħass il-ħtieġa, li l-atleti tagħna għandhom bżonn ta` aktar logħob. Għaldaqstant għall-ewwel darba se jsir festival għal Under 12 boys kif ukoll Under 16 girls. Nemmnu li wasal iż-żmien li niffukaw aktar fuq player development sabiex nkomplu ngħollu il-livell tal-logħba tagħna. Apparti minnhekk ser ikollna il-leagues tal-U14/ U16 / U18 / U20 boys kif ukoll Senior Women League tax-Xitwa kif ukoll dak tas-Sajf. Ħafna mil-logħbiet ser jibdew minn Novembru u ser isiru ġewwa il-Kottonera u meta noqorbu għal-perjodu tas-sajf, l-aħħar logħbiet ser jintlagħbu fil-pitches rispettivi tal-clubs. Fil-gimgħat li ġejjin ser ikun varat ukoll il-kampjonat tas-Seniors Water polo tax Xitwa kif ukoll dak tas-Sajf.
Kompetizzjonijiet Internazzjonali
Il-ħidma tal-ASA ma tieqafx biss fl-organizzazzjoni tal-kampjonati lokali, imma flimkien bil-għajnuna tal-Malta Tourism Authority u Sport Malta, għall-ewwel darba f`pajjiżna ser tiġi organizzata il-Malta Water Polo Christmas Cup (Men). Bħala timijiet se jkunu hawn Serbja, Montenegro, Olanda, Italja u Franza. Din hija opportunita unika għad-dilettanti tal-water polo sabiex jaraw fostna uħud mil-aqwa talenti f`dan l-isport. Il-logħob kollu ser isir ġewwa il-kumpless tal-Kottonera. Dan l-avveniment ser iservi sabiex dawn it-timijiet inkluż Malta, jippreparaw għal Kampjonati Ewropej. Ma kinitx faċli li ġġib dawn l-iġganti f`pajjizna imma ir-reputazzjoni tagħna għenet u mhux ftit.
Waqt il-konferenza tal-aħbarijiet, il-president tal-ASA Karl Izzo ħabbar ukoll li l-LEN European Junior Artistic Swimming Championships kif ukoll il-World Aquatics Men’s U16 Water Polo World Championships ser isiru ġewwa pajiżna f`Ġunju tas-sena d-dieħla. Dawn huma żewġ kompetizzjoniet kbar għaliex qatt qabel ma ġew organizzati kampjonati fuq livell ta` Worlds f`pajjizna. Żgur mhux forsi, li dawn l avvenimenti huma ta importanza nazzjonali u hija storika għal pajjiżna wkoll. Fil-Junior Artistic Swimming Championships ser nilqgħu fostna madwar 15 il-pajjiż u ser isir ġewwa il kumpless tal Kottonera.
Fil-World Aquatics Men’s U16 Water Polo World Championships ta’ Ġunju wkoll se jlaqqa’ f’pajjiżna 32 tim minn pajjiżi madwar id-dinja kollha. Kull tim jkun kompost minn 20 persuna fosthom atleti, staff tekniku u delegati. Apparti dan, mijiet oħra ta` ġenituri ser jivvjaġġaw għal dan it-tournament prestiġġjuż. Fil-fatt l-ASA għal dawn iż-żewġ kompetizzjonijiet, fil-jiem li ġejjin, ħa taħtar organisation committee li ser ikun qiegħed immexxi minn Rita Azzopardi s-Segretarja Generali tagħna. It-tim tagħna tal-U/16 ser ikun qiegħed jipprepara bis-sħiħ għal dan l-avveniment mil-kowċis Jonathan Valletta u Ryan Coleiro. Fil-fatt it-tim ser ikun qiegħed jikkompeti ukoll fil-kampjonat lokali tal-U/18 f`pajjizna.
Education Courses / Coaches Licence
L-ASA executive committee b’kollaborazzjoni mal-ASA Education Development Committee, għamlu passi kbar lejn it-titjib tal-istandards tal-coaching fil-qasam akwatiku f’Malta. Ittieħdet deċiżjoni li l-kowċis residenti f’Malta jkunu kwalifikati u liċenzjati. Dan huwa tabilħaqq żvilupp sinifikanti għaliex qatt qabel ma kellna sistema f`postha. Din id-deċiżjoni hija mmirata biex tiżgura s-sigurtà u l-professjonaliżmu. L-ASA temmen bis-sħiħ li għandu jkun hemm kowċis kwalifikati on deck għaliex huwa essenzjali jekk irridu t-tkabbir u s-suċċess kontinwu tal-isports akkwatiku f’Malta.
Bħala parti minn din l-inizjattiva, l-ASA daħlet fi ftehim ma diversi entitajiet fosthom mal-Institute for Swimming, li hija istituzzjoni rinomata bbażata fir-Renju Unit. Permezz ta’ din il-kollaborazzjoni, l-ASA se toffri courses gewwa pajjizna li jilħqu standards internazzjonali, u jiżguraw li l-kowċis jirċievu taħriġ u ċertifikazzjoni tal-ogħla livell. Dan il-ftehim jirrappreżenta pass sinifikanti sabiex inkabbru l-għarfien u l-ħiliet tal-kowċis biex jisbqu fir-rwoli tagħhom.
Intlaħaq ftehim ukoll mar-Royal Life Saving Society biex tipprovdi courses ta` first aid and lifesaving. Dawn il-courses huma mfassla biex jarmaw lill-kowċis b’ħiliet essenzjali li jsalvaw il-ħajja, u jiżguraw li jkunu ppreparati tajjeb biex jimmaniġġjaw sitwazzjonijiet ta’ emerġenza.
World Aquatics Water Polo Development Courses for Referees
L-ASA flimkien mal-World Aquatics, ser torganizza Development Referee Course li ser isir bejn 27-28 ta` Otturbu 2023 ġewwa l-Universita` ta` Malta. 18 il-persuna applikaw għal dan il-course li ser ikun qed jitmexxa mir-referee Taljan Massimiliano Caputi.
