Il-Prim Ministru Robert Abela ħabbar li l-Gvern se jagħti lura lin-nies, l-art taż-Żonqor u spazju bejn Bormla u l-Isla, li kellhom jiġu żviluppati bħala parti mill-Università Amerikana ta’ Malta.
Dr Abela qal dan fil-programm XTRA ppreżentat minn Saviour Balzan.
“Irnexxielna nilliberaw dik l-area sħiħa illi kienet se tintuża bħala dormitorji, dik li tagħti għal bieb l-Isla, dik se nagħtuha lura lin-nies ta’ Bormla u tal-Kottonera kollha imma mbagħad irnexxielna naslu wkoll fuq Wied il-Għajn ukoll u fuq Wied il-Għajn ukoll irnexxielna nilliberaw l-area kollha minn żvilupp, jiġifieri dik l-area li hija f’ODZ, kif ukoll l-area li tinsab fejn il-pixxina u fejn il-parkeġġ, dik l-Università se tagħtiha lura lill-Gvern biex aħna nkunu nistgħu nagħtuha lura lin-nies.”
Il-Prim Ministru Robert Abela
Fuq ix-xandir nazzjonali t-Tnejn filgħaxija, il-Prim Ministru qal li fuq art verġni li terġa’ tingħata lura lin-nies, il-Gvern sema’ lin-nies u saħaq li dan huwa l-mod kif isiru l-affarijiet, billi proġett ma jitkissirx iżda ssir ri-dimensjoni.
“L-Università, kemm l-espansjoni tagħha fuq l-att edukattiv, kif ukoll fejn huma d-dormitorji se jiġu rilokati f’sit li huwa diġà kommess għall-iżvilupp u allura qed nitkellmu dwar Smart City, fejn se jkollna l-ITS, se jkollna dan l-iżvilupp il-ġdid ta’ Smart City u allura bażikament ikollna area li tkun mogħtija għal skop edukattiv.”
Il-Prim Ministru Robert Abela
Il-Prim Ministru semma diversi inizjattivi favur l-ambjent u kif qed iħejji lil pajjiżna għal għada, fejn l-iskart isir riżorsa u l-kwalità tal-arja tkompli titjieb.
“Ta’ qabilna l-iskart taf kif kienu jimmaniġjawh? Billi jkabbru l-miżbliet. Aħna qed ngħidu li l-iskart irid isir riżorsa u kull forma ta’ skart se tkun qiegħda tintuża. Dawk huma l-bidliet illi jrid ikollna. It-titjib fil-kwalità tal-arja, proġett li nedejna ta’ Ħas-Saptan, jagħmel bidla enormi f’dan is-sens ukoll.”
Il-Prim Ministru Robert Abela
Tul intervista ta’ siegħa, li fiha l-Prim Ministru tkellem dwar il-futur sabiħ li qed jaħdem fuqu għal pajjiżna, huwa semma kif din is-sena mistennija tkun waħda rekord għall-investiment dirett barrani.
“Sena rekord għandha tkun għall-investiment barrani waqt li nkunu ħerġin mill-pandemija”, saħaq il-Prim Ministru, li spjega kif f’oqsma oħra bħat-turiżmu u s-settur tax-xogħol, mistenni żmien sabiħ.
“Illi ġej żmien sabiħ u ġej żmien sabiħ u ġa beda dak iż-żmien sabiħ. Qed jurih is-settur tat-turiżmu, semmejtlek aktar qabel il-bookings kif telgħin ’il fuq, qed jurih dak li għandna prospettat għas-sajf, qed jurih fuq kollox l-investiment u l-kwalità ta’ investiment illi ġej lejn pajjiżna hija xi ħaġa li verament li timlik b’kuraġġ. Qed jiġu l-investituri Maltin, Maltin issa qed nitkellem mhux l-investiment dirett barrani, il-Maltin li jiltaqgħu miegħi u sa ġimgħa ilu qed jgħiduli isma’, għandna proġetti kbar li qed inħossu lanqas għandna fejn nespandu iktar u rridu nkomplu ninvestu f’dan il-pajjiż. U dik hija xi ħaġa li vera timlik b’kuraġġ għax meta n-nies jibdew jitkellmu dwar pagi aħjar u kundizzjonijiet tax-xogħol aħjar, jien nista’ mmur inħabbat il-bieb ta’ dak l-iżviluppatur u ngħidilhom intom għamiltu l-investiment u għamiltu l-profitti onesti tagħhom u issa rridu naħsbu fin-nies.”
Il-Prim Ministru Robert Abela
