Il-Pulizija arrestat raġel ta’ 39 sena wara li nstabu fuqu oġġetti relatati ma’ droga.
Kmieni dalgħodu, għall-ħabta tat-2.45 a.m., il-Pulizija mid-Distrett tal-Belt Valletta kienu qegħdin jagħmlu ronda nnutaw xufier li kien għadu kemm wettaq kontravenzjoni tat-traffiku fi Triq San Kristofru, il-Belt Valletta.
Il-Pulizija waqqfu lix-xufier fl-inħawi ta’ Xatt Lascaris fejn meta ġie mitkellem huwa beda jaġixxi b’mod suspettuż. Wara tfittxijiet li saru fuqu, fil-karozza li kien qed isuq u r-residenza tiegħu, instabu oġġetti relatati ma’ droga.
Ir-raġel, mill-Furjana, ġie arrestat u nżamm mill-Pulizija għal aktar stħarriġ. L-investigazzjonijiet fuq dan il-każ għadhom għaddejin.
