Tard ilbieraħ filgħaxija f’San Ġiljan raġel ta’ 31 sena ġie arrestat wara li nstabu numru ta’ qratas b’sustanza suspettata droga kokaina u kannabis fil-pussess tiegħu.
Is-sejba saret wara li l-pulizija kienu fuq ronda fl-inħawi ta’ Triq Santu Wistin fejn lemħu raġel jaġixxi b’mod suspettuż meta l-pulizija resqu lejh. Minkejja li prova jaħrab jiġri huwa ġie arrestat ftit tal-ħin wara f’lukanda fil-viċin li kiseb l-aċċess għaliha minn bieb sekondarju u prova jistaħba fiha. L-akkużat irreżista l-arrest, bil-konsegwenza li pulizija weġġa’ ħafif.
Minn tfittxija li saret f’basket li kien qed iġorr ġew elevati 30 qartas b’sustanza allegatament kokaina, xi qratas bi droga cannabis u xi flus kontanti. Huwa qed jinżamm taħt arrest filwaqt li l-investigazzjonijiet mill-Pulizija għadhom għaddejjin.
