It-tfajliet Maltin, Lucia Calleja u Katrina Gauci mexxew workshop bl-isem ta’ ‘Current’ fl-edizzjoni ta’ din is-sena tal-Assemblea Ewropeja għall-istudenti tal-Arkitettura ġewwa Fredericia, fid-Danimarka. Dawn it-tfajliet mexxew għoxrin parteċipant minn madwar id-dinja biex flimkien mal-isponsors ħolqu din l-istruttura għall-port tad-Danimarka.
Il-padiljun, li huwa magħmul minn tipi differenti ta’ konkrit li jassorbu livelli differenti t’ ilma, jikkomemora l-ammonti kbar ta’ xita li jagħmlu f’dan il-post fil-waqt li joffri wkoll kenn f’dan it-tip ta’ temp. Din l-istruttura tissimbolizza s-sens t’ospitalità. Fil-fatt it-tema tal-Assemblea Ewropeja għall-istudenti tal-Arkitettura, li ssir kull Sajf, kienet “Hospitality. Finding the Framework”.
Biex hekk Lucia Calleja u Katrina Gauci flimkien mal-istudenti l-oħra ħolqu post fejn il-komunità tad-Danimarka u l-viżitaturi filwaqt li jistkennu mix-xita, jinteraġixxu u jissoċjalizzaw flimkien.
