Hekk kif irfisna l-għatba ta’ quddiem il-bieb ta’ barra bdejna nisimgħu l-melodiji ta’ numru ta’ strutturi li jagħmlu parti minn villaġġ kbir tal-Milied. Villaġġ li bla ma trid titfa’ ħarstek fuqu, tifli kull dettall li fih u bħal donnok terġa’ ssir tfal għax tħoss il-maġija li jġib miegħu l-Milied.
Din hija l-atmosfera li joħloq ta’ kull sena Ryan Spiteri f’daru għal żmien il-Milied.
Żornieh waqt li beda bl-armar tiegħu lura f’Ottubru, u b’kurżità staqsejnih dwar ix-xogħol li jinvolvi fih l-armar tal-villaġġ.
Huwa stqarr magħna: “L-aktar ħaġa li joħodlok ħafna xogħol, għandek ammont kbir ta’ plakkek, wiring, kif ħa tibni l-bażi … kull attraction. Hija xi ħaġa li bilfors trid tibda Ottubru inkella m’intix se tlestih u finalment trid tgawdih għal Diċembru.”
Ftit jiem qabel il-Milied, b’kull rokna tad-dar armata, id-DJ popolari għall-kanzunetti li jdoqq tas-snin disgħin u elfejn, qalilna li b’differenza għas-snin ta’ qabel, din is-sena qed igawdi aktar dak li jieħu ħafna ħin jarma.
Spiteri sostna: “Qabel ma tantx kontx ingawdi Diċembru u issa aktar għandi ħin ingawdi dan kollu. Is-soltu nieħu ħafna xogħol u kważi ma’ ngawdih xejn. Nista’ ngħid li l-pandemija, minn xi ħaġa ħażina ħareġ xi ħaġa tajjeb.”
Apparti l-villaġġ, li ta’ kull sena jżid aktar strutturi biex ikun aqwa mis-snin ta’ qabel, Ryan għandu wkoll waħda mill-akbar kollezzjonijiet ta’ Santa Klaws f’Malta, b’uħud minnhom imorru lura għexieren ta’ snin. B’interess staqsejnieh minn fejn ġab in-namra għal din il-kollezzjoni daqstant kbira.
Huwa dlonk qalilna li kien missieru li nibet fih l-imħabba lejn il-Milied u li minn ċkunitu kien affaxxinat b’Santa Klaws.
Ovvjament ħarsa lejn il-kollezzjoni vasta li għandu Ryan, wieħed ma jistax ma jitpaxxiex bl-atmosfera maġika tal-Milied li joħloq l-armar li għandu u li ilu jikkollezzjoni għal diversi snin.
