Tkompli s-saga tal-Partit Nazzjonalista u l-kontijiet finanzjarji tiegħu hekk kif kompliet tidher l-iskumdità fi ħdan ir-rappreżentanti tal-istess Partit.
F’konferenza tal-aħbarijiet li l-Partit Nazzjonalista għamel, il-kandidat Nazzjonalista għall-elezzjoni tal-Parlament Ewropew Lee Bugeja Bartolo farfar fuq il-Kap Bernard Grech għat-taħwid finanzjarju fil-Partit.
ĠURNALIST: “Daħħaltuhom il-kontijiet finanzjarji mal-Kummissjoni Elettorali?”
LEE BUGEJA BARTOLO: “M’għandi xejn aktar xi nżid ma’ dak li qal il-Kap tal-Partit Nazzjonalista Bernard Grech.”
ĠURNALIST: “Ħa tibqgħu tiksru l-liġi?”
LEE BUGEJA BARTOLO: “Irrispondejtek.”
L-iskumdità dehret ukoll f’wiċċ id-Deputat Nazzjonalista Beppe Fenech Adami, li meta komplejna nistaqsu, flimkien ma’ Bugeja Bartolo, ma kellu l-ebda għażla oħra ħlief li jlebbet ’il barra mill-kamra tal-konferenzi, bid-Direttur Informazzjoni tal-Partit Nazzjonalista jwaqqaf lil dan l-istazzjon milli jkompli jistaqsi l-mistoqsijiet.
Bernard Grech kien iddikjara li ma jistax isib awdituri biex jiffirmawlu l-kontijiet finanzjarju tiegħu.
Qal, “Ikun hemm kultant kumplikazzjonijiet, ħafna drabi jkunu ħmerija, ikollok bżonn awditur u ma ssibx awditur mill-ewwel u allura ċerti commitments ma tagħmilhomx fil-ħin.”
Mal-Kummissjoni Elettorali, il-Partit Nazzjonalista għadu ma ssottomettiex il-kontijiet finanzjarji awditjati u r-rapporti tad-donazzjonijiet li rċieva mill-2022 ’il quddiem.
Ifisser li kemm ilu Kap Bernard Grech, il-Partit Nazzjonalista għadu qatt ma ssottometta l-kontijiet finanzjarji u r-rapport tad-donazzjonijiet mal-Kummissjoni Elettorali bi ksur tal-Liġi tal-Finanzjament tal-Partiti.
Dan minkejja ħames ittri ta’ twissija li l-istess Kummissjoni Elettorali bagħtet lill-Partit Nazzjonalista biex jirregola ruħu u jżomm mal-obbligi tiegħu u ma jibqax jaħbi, waqt li l-kandidati Laburisti għall-elezzjoni tal-Parlament Ewropew, Daniel Attard u Marija Sara Vella Gafà, fetħu protest ġudizzjarju fil-Qorti u anke talbu lill-Kummissarju għall-Istandards fil-Ħajja Pubblika biex jinvestiga lil Bernard Grech.
