L-aġenzija tax-xogħol lokali Recruit in Malta ħarġet tfaħħar bil-kbir ir-riforma fil-liġi dwar it-temping agencies li qed tiġi proposta mill-Gvern.
Dan wara li l-Gvern ħabbar l-introduzzjoni ta’ regolamenti ġodda dwar l-aġenziji li jġibu l-ħaddiema barranin biex ikunu jistgħu jaħdmu f’pajjiżna. Fil-fatt, din ir-riforma se tassigura li f’pajjiżna jkun hawn ħaddiema ta’ kwalità li jaħdmu f’setturi fejn vera jkun hemm bżonn.
Daniel Coppini minn Recruit in Malta tenna hekk dwar ir-riforma importanti.
“Din il-liġi missha ilha li ħarġet, issa ħarġet. Aħna flejniha sew. Nafu x’hemm u x’ma hemmx. Fl-opinjoni tiegħi hi straightforward. Ma hemm xejn xi tgħid, hi ppreparata sew u hemm ċertu saħħa fiha.”
Daniel Coppini – Recruit in Malta
Tul id-diskussjoni dwar din ir-riforma, il-Prim Ministru Robert Abela kemm-il darba wkoll aċċenna għall-mod ta’ kif din il-liġi se tkun qed tnaqqas l-isfruttament ta’ ħaddiema barranin.
Dan is-sentiment ikkonfermah ukoll Coppini, hekk kif tenna li s-sitwazzjoni mingħajr din ir-riforma kienet tara numru kbir ta’ ħaddiema barranin jiġu sfruttati.
“Nafu eżattament il-polz ta’ dawn il-povra nies li ħafna drabi jridu jmorru lura d-dar b’loans kbar €5,000, €7,000, b’interessi kbar li jridu jħallsu, ħa jkunu diżonorati mill-familji tagħhom għax fallew, il-kultura tagħhom hekk tirrikjedi.”
Daniel Coppini – Recruit in Malta
Hawn Coppini tenna li filwaqt li din ir-riforma hi waħda b’saħħitha u tirrikjedi ċerti obbligi, dawk il-kumpaniji li dejjem ħadmu bil-għaqal m’għandhomx għalxiex jinkwetaw.
“Fl-aħħar mill-aħħar, min kien organizzat mill-bidu, li hemm, mhemm assolutament xejn. Eħe trid taħdem biex inġibu l-liċenzji, però din bħal tal-kostruzzjoni. Domna wisq biex ħarġet, issa ħarġet. Min kien serju mhux se jkollu problemi kbar.”
Daniel Coppini – Recruit in Malta
Fil-fatt, it-Tnejn filgħaxija din il-liġi bdiet tiġi diskussa fil-Parlament.
Fost oħrajn, indirizza d-diskussjoni, is-Segretarju Parlamentari għad-Djalogu Soċjali Andy Ellul, li hu responsabbli mir-riforma. Hu tenna wħud mill-affarijiet li se tkun qed tistipula din il-liġi, fosthom il-liċenzjar ta’ dawn l-istess aġenziji.
“Illi dawn l-aġenziji jekk jitilfu l-liċenzja ma jkunux jistgħu jipparteċipaw f’kuntratti pubbliċi jew awtorizzati jġibu ħaddiema minn barra l-pajjiż u kif ukoll il-liġi tistipula wkoll li f’ċerti każi anke tintilef il-liċenzja b’mod immedjat.”
Andy Ellul – Segretarju Parlamentari
