L-Iskola Primarja ta’ Ħal Għargħur nediet attività b’riżq tfal inqas ixxortjati fil-komunità u lil hinn bl-għoti ta’ rigali mill-istudenti stess. Fl-attività dawn ħolqu katina umana biex jgħaddu r-rigali kollha li ġabru minn wieħed għall-ieħor mill-iskola sal-knisja parrokkjali.
Dan l-isforz kollettiv u simboliku wassal biex dawn ir-rigali mbagħad għaddew għand id-destinatarji tagħhom – familji fil-bżonn fl-istess komunità ta’ Ħal Għargħur, waqt li grupp ieħor ta’ studenti marru dirett fi Pjazza Kastilja biex ipoġġu aktar rigali taħt is-Siġra tal-Milied bħala parti mill-attività ‘Rigal bi Mħabba’.
Il-Primarja ta’ Ħal Għargħur ħarġet bl-inizjattiva anke biex titrawwem iżjed kuxjenza dwar familji inqas ixxortjati fis-soċjetà.
“Hi inizjattiva li ħdimna fuqha mill-bidu tas-sena skolastika, qisha kienet ħolma li xtaqna nagħmlu. Se nagħmlu din il-human chain minn ġol-iskola għall-knisja tar-raħal ta’ Ħal Għargħur, fejn hemmhekk se jkun hemm il-qassis jistenniena u se ngħaddu kull rigal bħala simbolic gesture, ngħaddu kull rigal minn id tat-tfal u nwassluhom saz-zuntier t’hemmhekk.”
Silvana Ungaro – Kap tal-Iskola
L-istudenti, li ssieħbu f’din l-attività, laqgħuha b’mod tajjeb ħafna u r-rispons kien wieħed pożittiv, tant li l-ġenituri tal-istudenti marru bi ħġarhom biex jitpaxxew bl-inizjattiva.
Ta’ min ifakkar li, attwalment, fuq livell nazzjonali qed jinġabru rigali permezz tar-raba’ edizzjoni tal-attività ‘Rigal bi Mħabba’, taħt il-patroċinju ta’ mart il-Prim Ministru, Dr Lydia Abela, biex l-ebda tifel jew tifla f’pajjiżna ma jibqa’ mingħajr rigal dan il-Milied.
Waqt li f’kull belt u raħal se jkun hemm is-siġra biex jitpoġġew ir-rigali taħtha, l-attività tilħaq il-qofol fi Pjazza Kastilja fejn ir-rigali se jibqgħu jintlaqgħu sa nhar il-Ħamis 21 ta’ Diċembru.
