Kull min għadu ma ġabarx id-dokument għall-votazzjoni jista jiġbru personalment mill-Uffiċċju Elettorali, Kumpless tal-Għadd tal-Voti fin-Naxxar filwaqt li min hu votant irreġistrat f’Għawdex jista’ jiġbru mill-Uffiċċju tal-Karta tal-Identità, 28A Pjazza San Franġisk fir-Rabat Għawdex.
Fi stqarrija l-Kummissjoni Elettorali li l-jiem li fihom wieħed jista’ jiġbor id-dokument għall-votazzjoni huma dawn;
It-Tnejn 21, it-Tlieta 22 u l-Erbgħa 23 ta’ Marzu, 2022:
- mit-8.00 am sas-1.00 pm u mit-3.00 pm sad-9.00 pm
Il-Ħamis, 24 ta’ Marzu, 2022 (l-aħħar jum):
- mit-8.00 am sas-1.00 pm u mit-3.00 pm sa nofsillejl
Spjegat kif id-dokument irid jinġabar personalment filwaqt li tiġi ppreżentata l-karta tal-identità hekk kif l-ebda dokument ieħor ma jista’ jkun aċċettat.
Intant il-Kummissjoni Elettorali xtaqet tavża lill-votanti li huma rreġistrati fuq Għawdex u jixtiequ li jiġbru d-dokument għall-votazzjoni tagħhom minn Malta u, viċi versa, lill-votanti li huma rreġistrati Malta u jixtiequ li jiġbru d-dokument għall-votazzjoni tagħhom minn Għawdex, għandhom jagħmlu t-talba bil-miktub tagħhom malajr kemm jista’ jkun.
Il-Kummissjoni Elettorali ħeġġet lil min se juża dan is-servizz biex ma jħallix sal-aħħar jum minħabba li jekk ikun hemm ċirkostanzi li mgħandhiex kontroll fuqhom ma jkunx possibbli li d-dokument jinġieb fil-ħin legali stabbilit.
Importanti ħafna li t-talba ssir fuq bażi personali jew permezz ta’ email fuq maltagozo.electoral@gov.mt jew permezz ta’ formola, liema formola tista’ tintbagħat jew b’mod personali jew permezz ta’ email.
