L-eks Viċi Kap Nazzjonalista Robert Arrigo sostna li huwa twarrab mill-Partit Nazzjonalista u qalulu li huwa tajjeb biex jiġbor il-flus biss.
Huwa qal dan f’diskors li mmarka t-tmiem tal-kariga tiegħu bħala Viċi Kap Nazzjonalista hekk kif esprima l-uġigħ tiegħu għal mod ta’ kif mexa miegħu l-Partit Nazzjonalista.
F’diskors quddiem il-Kap tiegħu stess u li ħasad mhux ftit lil dawk preżenti, Robert Arrigo kompla jikxef l-intriċċi li kienu qed jinħmew kontrih mit-tmexxija ta’ Bernard Grech, partikolarment fl-aħħar kampanja elettorali tal-Partit Nazzjonalista għall-elezzjoni ġenerali ta’ Marzu li għadda.
Huwa beda billi qal li twarrab mill-Partit Nazzjonalista.
“Weġġajt? Iva, ħafna wkoll. Ma kontx naf għalfejn u sal-lum ma nafx għalfejn twarrabt jiena wkoll.”
Fil-fatt, elenka diversi istanzi fejn minkejja li kien Viċi Kap Nazzjonalista, huwa ngħata l-ġenb tant li fost oħrajn lanqas tħalla jitla’ fis-sular ta’ fuq tal-każin Nazzjonalista f’Ħaż-Żabbar.
“Weġġajt? Iva, għax ma nafx għalfejn wara meeting f’Ħaż-Żabbar, jiena twaqqaft u ma tħallejtx nitla’ fil-first floor tal-każin tal-PN f’Ħaż-Żabbar. Mario Degiorgio waqqafni.”
Arrigo żvela wkoll kif f’rally f’Tas-Sliema fl-aħħar kampanja elettorali, minkejja li huwa kien fil-kariga numru tnejn tal-Partit Nazzjonalista, lanqas biss tħalla jpoġġi fuq il-palk. Sostna kif Emvin Bartolo, Kunsillier Nazzjonalista fil-Mellieħa u wieħed minn dawk qrib ħafna ta’ Bernard Grech, qallu biex huwa joqgħod bil-wieqfa isfel.
“Weġġajt? Iva, meta f’Tas-Sliema waqt il-kampanja elettorali iva, kien ġie Emvin Bartolo u jgħili inti isfel mhux fuq il-palk u bqajt bilwieqfa isfel. Affarijiet li qatt m’għandhom qatt isiru. Never again.”
Hawn sostna li kienu jgħidulu biss li kapaċi jiġbor il-flus.
“Jibqalek dik id-dieqa, dik it-togħma qarsa ta’ xi ħaġa li inti ħabbejt tant. Kont kapaċi niġbor il-flus biss jgħiduli.”
Konferma oħra tal-iskumdità li Arrigo ssuġġetta għaliha lil Bernard Grech u l-bqija tal-Partit Nazzjonalista, kien il-fatt li l-istess partit, ħassar id-diskors ta’ Arrigo minn fuq is-sit uffiċjali tal-istazzjon tal-Partit Nazzjonalista. Fil-fatt, jekk wieħed jagħżel li jerġa’ jsegwi l-Kunsill Ġenerali, isib li x-xandira tintemm ħesrem mal-mument li l-eks Viċi Kap Nazzjonalista jibda jitkellem. Din umbgħad tkompli bid-diskors ta’ Alex Perici Calascione li propju tkellem wara Robert Arrigo.
Intant, ftit sigħat wara d-diskors tiegħu, għexieren ta’ persuni esprimew is-solidarjetà tagħhom għal mod ta’ kif ġie trattat Robert Arrigo.
Ewlieni fosthom kien id-Deputat u l-eks Kap Nazzjonalista Adrian Delia li fuq il-profil tiegħu fuq Facebook, ikkonferma għal kollox kemm il-feriti bejn il-fazzjonijiet fid-Dar Ċentrali għadhom fondi u għadhom jiddominaw.
Fil-fatt, Adrian Delia tenna li huwa ma jistax joqgħod kwiet jekk jisma’ b’inġustizzja dan filwaqt li ma jistax jonqsu mir-rispett lilu li naqsu jagħtuhulu. Fis-sezzjoni tal-kummenti wkoll huwa sostna li din ma tistax tieqaf hawn u trid tinġarr ir-responsabbiltà llum qabel għada. Hawn indirizza dan lis-Segretarju Ġenerali tal-Partit Nazzjonalista Michael Piccinino.
Hawnhekk ngħaqdu wkoll għexieren ta’ esponenti u attivisti Nazzjonalisti li quddiem dak li ġie żvelat minn Robert Arrigo, kollha bdew jitolbu għar-riżenja ta’ Bernard Grech.
Oħrajn, tennew is-sodisfazzjon tagħhom li telqu mill-Partit Nazzjonalista quddiem dawn l-intriċċi.
