Bejn is-Sibt u l-Ħadd, matul iż-żjara tal-Papa Franġisku f’pajjiżna, il-Kap tal-Knisja Kattolika se jgħaddi minn ħdax-il rotta.
Is-Sibt fl-għaxra ta’ filgħodu se ssir l-ewwel rotta mill-Ajruport Internazzjonali ta’ Malta għall-Palazz tal-President. Huwa se jgħaddi minn Vjal l-Avjazzjoni għal Triq il-Kunsill tal-Ewropa, Triq Ħal Luqa għal Vjal Santa Luċija għall-Flyovers tal-Marsa, Triq Aldo Moro u Triq Diċembru Tlettax. Ħdejn il-Bieb il-Bombi, il-Papa Franġisku se jirkeb fuq il-Popemobile u jibqa’ dieħel lejn Pjazza San Ġorġ.
It-tieni rotta se tkun dik minn Pjazza San Ġorġ għan-Nunzjatura fir-Rabat, li se tibda għall-ħabta ta’ nofsinhar. Il-Papa Franġisku hawnhekk se jgħaddi minn ħdejn il-Monument tal-Gwerra, għal Triq San Franġisk fil-Floriana. Hawnhekk se jerġa’ jbiddel mill-Popemobile għal karozza uffiċjali. Il-Papa se jgħaddi minn Triq Diċembru Tlettax, Marsa Ħamrun Bypass għal Imrieħel Bypass, is-Central Link u s-Saqqajja. Minn hemm se jmur lejn Triq Nikola Saura, Triq tal-Virtù għan-Nunzjatura fir-Rabat.
It-tielet rotta se tkun mir-Rabat lejn il-Port il-Kbir. Għall-ħabta tat-tlieta u nofs ta’ wara nofsinhar il-Papa Franġisku se jgħaddi mis-Saqqajja lejn is-Central Link, lejn l-Imrieħel Bypass, lejn il-Marsa Ħamrun Bypass, Triq Diċembru Tlettax lejn Triq Sant Anna lejn ix-Xatt tal-Port il-Kbir. Fl-erbgħa neqsin għaxra ta’ wara nofsinhar se jaqbad il-Katamaran Maria Dolores lejn il-gżira Għawdxija.
Ir-raba’ rotta se tkun mill-Port tal-Imġarr Għawdex għal Santwarju Ta’ Pinu, li se titlaq għall-ħabta ta’ ħamsa ta’ waranofsinhar. Il-Papa Franġisku se jgħaddi minn Triq l-Imġarr lejn Triq Fortunato Mizzi r-Rabat Għawdex. Hawnhekk il-Papa Franġisku ser ibiddel il-karozza għal fuq Popemobile. Il-Kap tal-Knisja Kattolika se jgħaddi għal Triq ir-Reppublika jgħaddi minn Pjazza Indipendenza għal Triq Sant Ursula, Triq il-Papa Ġwanni Pawlu, Triq l-Għarb u Triq ta’ Pinu għas-Santwarju.
Il-ħames rotta se tkun lura l-Port tal-Imġarr, b’din se tibda għall-ħabta tas-sitta u nofs ta’ waranofsinhar.
Is-sitt rotta tal-Papa Franġisku se jkun miċ-Ċirkewwa lura lejn in-Nunzjatura fir-Rabat. Din ir-rotta se tgħaddi minn Triq il-Marfa, għal Triq Ġorġ Borg Olivier fil-Mellieħa għat-Telgħa tas-Selmun. Minn hemm il-Papa se jgħaddi minn Triq il-Mistra, it-Telgħa tax-Xemxija għal Bypass ta’ San Pawl il-Baħar, Triq Burmarrad, Triq il-Missjunarji Maltin għal Triq Buqana lejn Triq l-Infetti u t-Telgħa tas-Saqqajja u n-Nunzjatura, fejn hawnhekk tintemm il-ġurnata tas-Sibt.
Is-seba’ rotta tal-Papa Franġsiku se tkun min-Nunzjatura għal Grotta ta’ San Pawl fir-Rabat. Din ir-rotta se tibda għall-ħabta tat-tmienja u nofs neqsin ħamsa tal-Ħadd, fejn min-Nunzjatura se jmur Triq Borg Olivier, Triq il-Kulleġġ għall-Bażilka ta’ San Pawl fir-Rabat.
Fit-tmien rotta, il-Papa Franġisku ser imur lejn il-quddiesa tal-Ħadd fuq il-Fosos tal-Floriana. Il-Papa ser jitlaq mill-Knisja ta’ San Pawl lejn Triq il-Museum, it-Telgħa tas-Saqqajja lejn is-Central Link. Minn hemm se jmur lejn Triq Notabile, it-Triq il-Kbira San Ġużepp għal Blata l-Bajda. Quddiem il-Kappella tal-MUSEUM, il-Papa Franġisku se jbiddel mill-karozza uffiċjali għal Popemobile. Minn hemm il-Papa se jmur lejn Triq Sant’Anna, idur mar-roundabout tal-Monument tal-Gwerra u jerġa’ għal Triq Sarria, fejn hemmhekk se jmur għal fuq il-Fosos.
Id-disa’ rotta se tkun mill-Fosos għan-Nunzjatura fir-Rabat, wara l-quddiesa prinċipali, b’din ir-rotta se tibda għall-ħabta tal-kwarta.
L-għaxar rotta se tkun min-Nunzjatura għal Laboratorju tal-Paċi f’Ħal Far. Huwa ser jitlaq għall-aħħar darba min-Nunzjatura fir-Rabat, fejn ser jinżel mit-Telgħa tas-Saqqajja għas-Central Link għall-Imrieħel Bypass għal Marsa-Ħamrun Bypass u Triq Aldo Moro. Il-Papa Franġisku ser jgħaddi mill-Flyover tal-Marsa għal taħt il-Mina ta’ Santa Luċija, it-Triq tal-Barrani, Triq Għar Dalam, Triq San Patrizju għal Triq Ħal Far.
Il-ħdax u l-aħħar rotta hija mil-Laboratorju tal-Paċi għal Ajruport Internazzjonali ta’ Malta. Huwa se jitlaq minn hemm għall-ħabta tal-ħamsa u nofs ta’ waranofsinhar u jasal ftit wara, fejn se ssir iċ-ċerimonja tat-tluq tal-Papa.
