Ara meta se jkunu qed jivvotaw fid-djar tal-anzjani u l-isptarijiet

Il-Kummissjoni Elettorali ħarġet il-jiem u l-ħinijiet ta’ votazzjoni ta’ persuni li jinsabu f’San Vinċenz de Paul, fl-34 Dar tal-Anzjani u fl-Isptarijiet Mater Dei, inkluż l-Isptar tal-Onkoloġia Sir Anthony Mamo, Karin Grech, Monte Karmeli u l-Isptar Ġenerali f’Għawdex, inkluż Downtown Hotel.

Fir-Residenza San Vinċenz de Paul u 34 Dar tal-Anzjani  (ara skeda) – is-Sibt, 19 ta’ Marzu, 2022; 

Fl-Isptarijiet Mater Dei, Karin Grech, Monte Karmeli u l-Isptar Ġenerali ta’ Għawdex, il-Ħamis, 24 ta’ Marzu. Il-ħin tal-votazzjoni jkun mis-7.00 a.m. sal-10.00 p.m. mingħajr waqfien.

Fil-każ tar-Residenza San Vinċenz de Paul u tal-34 Dar tal-Anzjani

Jivvotaw f’dawn il-postijiet, fid-19 ta’ Marzu, dawk il-votanti li huma reġistrati f’dawn l-istituzzjonijiet, kif ukoll dawk kollha residenti, iżda mhux reġistrati bħala votanti fihom, sas-Sibt, 12 ta’ Marzu, 2022.

Intant dawk il-membri tal-familja jew persuni oħra li għandhom id-dokument għall-votazzjoni ta’ xi qraba jew persuni oħra bħalissa residenti f’San Vinċenz de Paul u fid-Djar tal-Anzjani għandhom jagħtu dan id-dokument lil din il-persuna sa mhux aktar tard min-nofsinhar tal-Ġimgħa, 18 ta’ Marzu.

Fid-19 ta’ Marzu ma jkunx hemm ħinijiet għall-viżitaturi f’dawn l-istituzzjonijiet.

Fil-każ tal-Isptarijiet Mater Dei, Karen Grech, Monte Karmeli u l-Isptar Ġenerali ta’ Għawdex:

Jivvotaw f’dawn il-postijiet, fl-24 ta’ Marzu, il-votanti rikoverati fihom sas-6.00 ta’ filgħaxija tat-Tnejn, 21 ta’ Marzu, u mhux kif jidher fuq id-dokument tal-votazzjoni tagħhom. Huwa importanti li dawn il-votanti jiżguraw li d-dokument/i tal-vot tagħhom ikunu fil-pussess tagħhom sal-20 ta’ Marzu, 2022.

Skeda