Hekk kif it-Tlieta filgħodu tħabbru sittax il-proġett ambjentali ġdid li ser ikunu qed isiru madwar pajjiżna sal-2025, b’investiment ta’ €10 miljun fis-servizz li jmiss se naraw kull proġett x’se jkun qed jinkludi u f’liema lokalità se jkun qed isir.
Fil-proġett tal-Hospice Landscape Garden f’Santa Venera seta’ kien hemm bini ta’ 5 sulari iżda minflok se jsir ġnien li se jorbot mal-ħtiġijiet tal-Hospice Malta. Il-ġnien se jkun ta’servizz għall-pazjenti b’kura paljattiva. Dan se jkun aċċessibbli għall-pubbliku u madwar 9,000 ruħ se jkunu 10 minuti l-bogħod minnu bil-mixi.
Fl-Imtarfa se jsir Fruit Forest fl-Imtarfa u se jkun fil-qalba ta’ qasam tad-djar. Din iż-żona se tinbidel fi spazju miftuħ ta’ 3,000 metru kwadru b’160 siġra u 400 arbuxell. Din iż-żona se tkun qed titmexxa mill-komunità stess.
Il-Ġnien Malti f’Birkirkara se jkun qed jinvolvi spazju ta’ 2,500 metru kwadru wara ħidma mal-eNGOs Grow 10 Trees. Din iż-żona se tinbidel fi ġnien botaniku u fost oħrajn se tinkludi bank ta’ żrieragħ għall-pjanti indiġeni. Se jitħawlu wkoll iktar minn 2,000 siġra b’12,000 persuna se jgawdu minn dan il-ġnien.
Ġnien Reggie Miller fil-Mosta se jkun qed jinsab wara l-Bażilika Mosta u se jinbidel fi spazju ta’ 2,000 metru kwadru li jintegra mal-kumplament tat-toroq fil-pjazza. L-idea hi tingħata prijorità lil spazji ħodor u se jgawdu minnhom mal-14,000 ruħ.
Fil-Mellieħa se jsir Ġnien Triq il-Għasel b’2,000 metru kwadru ta’ spazju miftuħ li bħalissa hu mitluq u bħalissa jintuża biss biex jintrema l-iskart.
F’Ħal Għaxaq se jsir it-Taż-Żebbuġ Picnic Site. Dan se jkun park tal-familja ta’ 22,000 metru kwadru u se jkun park totalment ġdi. Bħalissa din qed tintuża b’mod illegali bħala dumping site u minflok fiha se jitħawlu 1,100 siġra. Dan il-park se jkollu mogħdijiet aċċessibbli għall-persuni b’diżabilità mingħajr ma jintuża l-konkrit.
Permezz tar-Rainwater Harvesting Park f’Għajnsielem wkoll se jinħoloq spazju miftuħ ġdid. Dan il-park se jara wkoll restawr ta’ tliet ċisterni. Fil-fatt f’dan il-park jinġabar ħafna ilma fih u b’hekk se jkunu qed jinġabru 84,000 metru kubu ta’ ilma. Dan il-park se jkun mifrux fuq 1,100 metru kwadru u se jibbenefikaw minnu mal-1,000 ruħ.
Pjazza Victor Denaro fl-Imsida li tinsab ħdejn l-iskola l-ġdida se tinbidel f’waħda aktar ħadra u li telimina t-traffiku miż-żona. L-idea hi l-istudenti jibdew jużaw dan l-ispazju miftuħ bħala parti mill-vjaġġ edukattiv tagħhom.
F’San Pawl il-Baħar il-Birdlife b’suċċess applikat għas-Simar Nature Reserve. Hawn se jkun hawn 4,000 metru kwadru ta’ spazju li bħalissa qed jiġu abbużat b’rimi ta’ skart illegali. Dan il-proġett se jara li jinkludi picnic area mżewġa mal-aspett ambjentali.
Il-Park Tal-Kavallerizza f’Marsaxlokk se jkun Park tal-Familja bi spazju li jkopri mal-4,500 metru kwadru u li se jkun qed jinsab viċin il-grawnd tal-futbol. Il-ħsieb huwa li ż-żona tikber għal 5,000 metru kwadru u huwa pjanat li jiddaħħlu kunċetti ta’ bijodiversità.
Fil-Gżira se jsir ukoll Green Shelter bħala spazju aħdar ħdejn waħda mill-iktar waqfiet tal-linja li jużaw in-nies fil-Gżira.
Intant, fil-Għargħur se jsir it-Ta’ Xwieki Sports Park. Ġnien li se jinbena u minflok se jsir park li jkopri iktar minn 2,000 metru kwadru. Dan il-park se jkun qed iħaddan fih l-element sportiv.
F’Bormla wkoll se jsir New Leaf Park – Park li se jkun qed ikopri 4,200 metru kwadru u se jkun fih element ta’ ambjent u edukazzjoni.
Ġnien Mediterran f’Raħal Ġdid se jkun qed ikopri spazju ta’ 21,000 metru kwadru viċin l-MCAST. Dan l-ispazju se jiġi mibdul mill-qiegħ u se tolqot direttament b’mod pożittiv 18,000 persuna.
Fiż-Żurrieq Pjazza Karmelitani li hija żona ta’ 1,000 metru kwadru u li bħalissa tagħti l-prijorità lill-karozzi, issa se tiġi mibdula fi spazju miftuħ.
U finalment fil-Pietà se jsir il-Pietà Playground hekk kif dak li llum huwa bandli se jinbidel fi spazji ħodor u se jiddaħħal element ta’ parkour. Dan l-ispazju se jkopri b’kollox 1,500 metru kwadru.
Aqra Aktar
