Dak li qatt ma stennew id-dilettanti tal-Ġimgħa l-Kbira reġa’ kien realtà, hekk kif għat-tieni sena konsekuttiva, tħassru l-purċissjonijiet fit-toroq u l-funzjonijiet għan-nies fil-knejjes.
Fil-lokalità ta’ Ħal Luqa, fejn il-purċissjoni tmur lura għal madwar mitejn u ħamsin sena, spikkat il-ħemda fil-knisja, fejn din is-sena ġew armati biss tliet vari – tar-Redentur, il-Vara l-Kbira u d-Duluri.
Is-sitt vari l-oħra jinsabu mgħottija b’liżar fil-maħżen, fejn issa ilhom ma jaraw id-dawl tax-xemx għal dawn l-aħħar sentejn.
Tradizzjoni li minkejja r-restrizzjonijiet tal-pandemija saret xorta, hija dik taċ-ċuqlajta.
Mill-ġenb tal-knisja, fejn hemm garigor ta’ disgħin tarġa għall-fuq il-bejt, crew ta’ ONE News segwa mill-qrib kif taħdem iċ-ċuqlajta, li fl-aħħar snin, bdiet taħdem bl-elettriku.
Iċ-ċuqlajta f’Ħal Luqa hija magħmula minn salib tal-injam bi tnax-il martell.
Henry Galea, mill-għaqda tad-Dilettanti tal-Ġimgħa l-Kbira f’Ħal Luqa, spjega li ċ-ċuqlajta f’din il-lokalità għandha storja li tmur lura madwar mitt sena, u dan sar magħruf waqt restawr li sarilha sitt snin ilu.
Qal kif, “Proprjament l-idea kienet li nibdluha għax kellha ħafna ħsara però x’ħin rajna u bdejna nistaqsu l-anzjani li dak iż-żmien kellhom disgħin, ħamsa u tmenin sena, kienu qed jgħidulna li dejjem jiftakruha. Saħansitra sibna msiemer ta’ Malta fiha li anzjani qalulna li l-aħħar li dehru fl-Ewwel Gwerra Dinjija.”
L-iskop wara l-ħoss taċ-ċuqlajta, li tibda tindaqq f’Ħamis ix-Xirka u tkompli tul il-jum tal-Ġimgħa, huwa wieħed ta’ luttu, li jirrifletti l-passjoni ta’ Sidna Ġesù Kristu.
Spjega, “F’dan iż-żmien ta’ pandemija, naħseb ħa tieħu naqra iktar sens spiritwali minn dak tradizzjonali li żgur ħa tkun ta’ luttu għal dawk in-nies li tilfu ħajjithom tul din il-pandemija u fl-istess ħin ħa tkun ta’ karba u messaġġ ta’ kuraġġ biex aħna bħala Maltin ningħaqdu ħalli nirbħu din il-pandemija flimkien.”
Il-Kappillan ta’ Ħal Luqa, il-Kanonku Fr Michael Zammit, fakkar fil-messaġġ tal-Knisja f’dan il-jum.
Qal, “Il-messaġġ tal-Ġimgħa l-Kbira u tal-Għid il-Kbir huwa wieħed ċentrali fil-fidi tagħna, hija l-akbar festa li niċċelebraw li Ġesù bata u miet għalina biex isalvana u li qam mill-mewt biex aħna ngħixu miegħu u għalhekk dan il-messaġġ huwa messaġġ li rridu nġorruh magħna kuljum aħna l-Insara.”
Il-Kanonku ħeġġeġ lill-pubbliku biex isegwi l-funzjonijiet reliġjużi minn fuq it-televiżjoni jew il-mezzi soċjali.
Qal, “Ejjew f’dawn il-ġranet nirriflettu fuq l-imħabba kbira li Alla għandu għalina l-bnedmin.”
