Is-Sibt filgħodu ngħatat l-aħħar tislima lill-eks Segretarju Ġenerali tal-General Workers’ Union, Tony Zarb. Għall-ħabta tad-disgħa ta’ filgħodu, it-tebut tiegħu twassal permezz ta’ korteo li telaq mill-isptar Mater Dei għall-kwartieri fil-Belt Valletta, li hija s-sede tal-General Workers Union, li Zarb mexxa għal 17-il sena sħaħ.
Fl-entratura tal-Workers’ Memorial Building, għajnejn l-eks kollegi ta’ Tony Zarb imtlew bid-dmugħ meta ndaqqew żewġ kanzunetti li tant kienu għal qalbu: ‘Ħaddemin’ ta’ Mary Spiteri u ‘You’ll Never Walk Alone’ ta’ Gerry & The Pacemakers. Wara, it-tmexxija tal-General Workers’ Union poġġiet il-bandiera bl-emblema tal-Unjin fuq it-tebut b’sinjal ta’ apprezzament għal dak kolli li għamel għall-unjin u għall-ħaddiema.
Mill-Workers’ Memorial Building, il-korteo wasal fil-Knisja Arċipretali tal-Furjana fejn giet ikkonċelebrata quddiesa għal ruħ Tony Zarb.
Fl-omelija tiegħu, l-Arċipriet tal-Furjana, il-Kanonku Charles Cini, semma fost l-oħrajn il-qalb kbira li kellu Tony Zarb, il-legat ta’ altruiżmu li se jħalli, l-imħabba li kellu għall-familja tiegħu, u kemm ħadem bi sħiħ favur il-ġust u s-sewwa.
Il-Kanonku Cini semma l-imħabba li Tony Zarb kellu favur il-ħaddiem u d-dinjità tiegħu. Irrefera wkoll għal aktar minn mitt sena ilu, u semma l-Enċiklika ‘Rerum Novarum’. Hu spjega kif Tony Zarb ħadem bis-sħiħ favur id-dinjità tal-ħaddiema u favur il-kwalità tax-xogħol.
‘Tony huwa personalità pubblika li se jibqa fl-istorja tat-trejdunjoniżmu, iżda kulħadd jaf li Tony dejjem ħaseb fil-ħaddiem, fid-dinjità tal-ħaddiem, dak il-ħaddiem li huwa żgħir, dak li l-għajxien tiegħu hu biss il-paga u li mhux dejjem kien faċli li jgħaddi biha’.
L-Arċipriet tal-Furjana semma l-kliem li xpruna lil Tony Zarb biex ċertament jaħdem favur il-vulnerabbli – ‘Dak li għamiltu mal-iżgħar fost ħuti tkunu għamiltuh miegħi’. Semma wkoll episodju f’ħajjet Tony Zarb meta, minħabba deċiżjoni f’waqtha li ħa, salva tarbija. Zarb jirrakkonta li kien iltaqa’ ma’ ġuvnott li kien qallu li kien hu li, tnax-il sena qabel, kien tah il-ħajja mill-ġdid: esperjenza li, ma’ min kien jirrakkontaha, Zarb kien jikkummenta li tqabbdu dehxa.
“Ma nistgħux ma nsemmux il-ġrajja ta’ meta kien se jsir l-istrajk fil-kumpanija tal-linja tal-ajru Maltija, meta ġew koppja bit-tarbija fi jdejhom, jgħidu lil Tony, jekk it-tarbija tasalx sa nofsinhar l-Ingilterra t-tarbija probabbli tmut. Tony kien pront issospenda dan l-istrajk.”
Għall-quddiesa attendew l-ogħla awtoritajiet tal-pajjiż, fosthom mart il-President ta’ Malta, Miriam Vella, il-Prim Ministru Robert Abela, il-Membru Parlamentari Ewropea Josianne Cutajar, l-Ispeaker Anġlu Farrugia, diversi membri parlamentari miż-żewġ naħat tal-Kamra, kif ukoll it-tmexxija tal-General Workers’ Union, tal-Union Ħaddiema Magħudin, u diversi trejdunjonistiċi oħrajn.
Dwar Tony Zarb tkellimna mas-Segertarju Ġenerali tal-General Workers’ Union, Josef Bugeja.
“Bla kliem. Illum tajnieh l-aħħar tislima. Ġie l-Unjin għall-aħħar darba. Irringrazzjajnieh tal-ħidma li għamel għal Malta, għall-ħaddiem li kien iħobb. Issa neħduh għall-aħħar vjaġġ tiegħu. M’hemmx ħafna xi żżid u ma tantx għandi kliem. Kien maħbub u ħa jimmisjawh in-nies żgur.”
Gejtu Vella, li kien is-Segretarju Ġenerali tal-UĦM fż-żmien li Tony Zarb serva bħala s-Segretarju Ġenerali tal-GWU, ukoll kellu kliem sabiħ dwar Tony Zarb.
“Għalkemm konna diversi drabi nidhru ma naqblux, fil-verità Tony Zarb huwa raġel sewwa ħafna. Nafu bħala raġel sewwa ħafna u fil-verità ħadem ħafna għall-ħaddiema. Jiena, fil-fehma tiegħi, Tony Zarb għamel ħafna ġid għall-ħaddiema.”
Emozzjonat għall-aħħar, l-eks President tal-MUT u eks Chairman tal-Kunsill Malti għall-Iżvilupp Ekonomiku u Soċjali, John Bencini, iddeskriva l-qalb tajba li kellu Tony Zarb.
“Parti kbira mill-istorja ta’ tredjunjoniżmu tal-pajjiż. Kien bniedem illi jħobb liż-żgħir, iħobb lill-fqir, iħobb lill-batut, jibki malajr, bħali, anki meta jara xi ħaġa li tweġġgħu. Huwa bniedem li jiena żgur sa nimmissjah ħafna. Jumejn qabel ma miet, ċempilli u bqajt mistagħġeb – mhux se nċempillu jiena, qiegħed fis-sodda, imma ċempilli. Għadni ngħożż l-aħħar kliem li qalli ftit sigħat qabel ma l-Mulej sejjaħlu.”
Tkellimna wkoll mal-eks Deputat Segretarju Ġenerali tal-GWU, Mario Cutajar, li ħadem mill-qrib ma’ Zarb fil-Unjin għal ħmistax-il sena.
“Ħdimna flimkien meta konna segretarji tat-Taqsimiet, hu tat-Trasport u jien tat-Taqsima tal-Gvern. Min jaf kemm ikkollaborajna flimkien, min jaf kemm iġġelidna, min jaf kemm iddiskutejna, minn jaf kemm illetikajna… imma mbagħad, fl-aħħar mill-aħħar, kien hemm għan ewlieni. Kien hemm għan wieħed, għan aħħari, li ntejbu l-qagħda tal-ħaddiema. Illum Tony Zarb huwa sinonimu mal-klassi tal-ħaddiema, mal-mod kif għandha titjieb il-qagħda tal-ħaddiema.”
Tony Zarb li dejjem ħabb lil ħaddiem u lil Malta, serva bħala Segretarju Ġenerali tal-General Workers’ Union bejn l-1998 u l-2015. Minkejja s-saħħa batuta tiegħu f’dawn l-aħħar xhur, kien għadu jservi bħala s-Segretarju tal-Għaqda tal-Pensjonanti tal-GWU. Huwa ħalla din id-dinja nhar il-Ħadd 29 ta’ Mejju, waqt li kien qed jingħata l-kura fi sptar il-Belġju. Huwa kellu 68 sena.
