Mużiċist u artist. Ħajtu qatagħha fil-mużika u l-karnival. Bena reputazzjoni għalih personali tant li jibqa magħruf b’għożża minn kull min għandu għall-qalbu, l-arti u l-kultura.
Hekk ġie deskritt Pawlu Curmi, magħruf aħjar bħala Pawlu l-Pampalun, li s-Sibt ngħata l-aħħar tislima wara li ħalla din id-dinja fl-età ta’ tnejn u disgħin sena.
Fil-fatt, kienu bosta li ddeskrivew lil Pawlu bħala persuna b’karattru umli, b’kariżma, b’element posittiv u li jnissel ferħ fost kulħadd.
Matul iż-żmien Pawlu ġibed tant ammirazzjoni minn bosta. Il-ħoss u l-daqqa mat-tanbur kien il-ġojja tiegħu. Ir-ritmu mużikali kien minqux f’qalbu u mal-ewwel tokki kont tarah jitfa saqajh skont il-ħoss mużikali.
Il-Beltin tawh “Ġieh il-Belt Valletta” u ġensna kien irrikonoxxih bil-mertu ta’ “Ġieh ir-Repubblika”.
Bħal ma kienu jċapċpulu fil-ħames tijiem tal-Karnival, sena wara sena, hekk kif kienu jieħu postu, biex imexxi b’ħila il-kumpanija taż-żfin tiegħu, is-Sibt filgħodu n-nies ġew u tawh ġieh. Fis-Santwarju tal-Madonna tal-Karmnu ma kinitx toqgħod labra. Fi kliem ir-Rettur tas-Santwarju Fr Alex Scerri, lkoll kemm aħna għandna nimxu ħajjitna fuq l-eżempju ta’ Pawlu Curmi.
“Nirringrazjak Pawl, nirringrazjak Pampalun, tal-eżempji kbar, sbieħ, tal-pożittività li urejt fil-ħajja tiegħek, għent lilna wkoll biex aħna wkoll inkunu nies pożittivi fil-ħajja tagħna, fid-dinja tagħna”.
Fr. Alex Scerri – Rettur tas-Santwarju
Dan l-ikona tal-Karnival ta’ Malta u leġġenda qalb il-karristi, il-karrijiet, u l-passi tiegħu mar-ritmu mużikali se jibqa ttimbrat mal-milja tas-snin fil-qalb tal-Maltin u l-Għawdxin kollha.
“Għalija kien persuna, l-ewwel nett idolu, u persuna speċjali fil-ħajja tiegħi. Jiena niftakru dejjem, kważi ħajti kollha. Minn mindu kont żgħir, kont dilettant bla dubju tal-Karnival u kont nieħu sehem wkoll miegħu jiġifieri kien xi ħaġa speċjali.”
Charles Portelli – neputi
“Pawlu ma qatax qalbu u baqa’ għaddej sal-aħħar mument u Pawlu barra milli kien karnivalist, kien drummer tajjeb ħafna ma’ Oscar Lucas u nispera li l-karnival kif kien iħobbu Pawlu, kien u jibqa’ l-akbar festa Maltija”.
George Zahra – organizzatur
“Mill-attendenzi li kellna llum, tista’ tara kemm kien raġel maħbub. Jiena għedt t f’ħafna programmi li ġejt intervistat, kulħadd jaf li kien bravu, mhux hu biss kien bravu, imma jiena naħseb li dawn in-nies mhux għax kien jagħmel il-karnival, kien persuna vera differenti. Trid tiddistingwih minn ħafna oħrajn. Il-Belt ngħidulhom karattri dawn, il-Belt tilfet karattru. Dan kont tarah Strada Rjali mat-tfal, kulħadd jgħajjtlu, qisu Father Christmas tas-sena kollha, ngħidlu jien”.
George Curmi il-Puse
Iċ-ċelebrazzjoni ta’ ħajjet Pawlu Curmi intemmet b’din it-tislima, b’dan l-Innu li min jaf kemm nissel ferħ, f’eluf ta’ nies, permezz tal-Pampalun fi Pjazza Ħelsien u l-Main Guard fi Pjazza San Ġorġ.
