Ġiet ippubblikata impressjoni artistika tat-tribuna li ser tkun qed tinbena fuq il-Fosos tal-Floriana u li minnha l-Papa Franġisku ser ikun qed jiċċelebra quddiesa nhar il-Ħadd, 3 t’April għall-ħabta tal-10:15 ta’ filgħodu.
Id-disinn tat-tribuna ġie ispirat mill-forma tal-kurċifiss, biċ-ċirku u r-raġġi ħerġin minnu jirrappreżentaw l-Ewkaristija.
Din it-tribuna ser tkun qed tilqa’ fi ħdanha 600 saċerdot li ser jikkonċelebraw mal-Papa.
Fl-ewwel jumejn meta fetħet ir-reġistrazzjoni għall-post bilqiegħda fuq il-Fosos applikaw eluf ta’ nies.
Għall-quddiesa se jkun hemm żona riservata għall-persuni b’siġġu tar-roti u żona għall-persuni neqsin mis-smigħ u li għandhom bżonn interpretu tal-Lingwa tas-Sinjali Maltija.
Kull min irreġistra se jirċievi biljett b’email li għandu jiġi ppreżentat dakinhar. Il-Knisja qed tappella lin-nies sabiex jaħsbu kmieni u jużaw it-trasport pubbliku.
Kull min għandu bżonn aktar tagħrif dwar il-quddiesa mill-Papa Franġisku jista’ jibgħat email fuq papalvisit@maltadiocese.org.
