Is-Sibt 26 ta’ Diċembru, l-għada tal-Milied f’pajjiżna waslu l-ewwel għaxart elef doża ta’ vaċċin għal kontra l-COVID-19. Dan wara li t-Tnejn li għadda, l-Aġenzija Ewropea tal-Mediċini approvat il-vaċċin ta’ BioNTech u Pfizer.
Biex imbagħad l-għada, il-Ħadd 27 ta’ Diċembru fid-disgħa ta’ filgħodu se titlaqqam l-ewwel persuna. Din se tkun infermiera mit-Taqsima tal-Mard Infettiv fl-Isptar Mater Dei u warajha fl-istess ġurnata se jingħataw din it-tilqima erbgħa u ħamsin persuna oħra. Dawn l-ewwel ħamsa u ħamsin persuna huma ħaddiema fil-qasam tas-saħħa fosthom dawk li jaħdmu fit-Taqsima tal-Mard Infettiv, mit-Taqsima tal-Kura Intensiva, ħaddiema tal-emerġenza u ħaddiema fis-swali fejn hemm pazjenti pożittivi għall-COVID-19.
It-Tnejn 28 ta’ Diċembru se jibdew jitlaqqmu dawk li jaħdmu fil-kura primarja u dawk li jaħdmu fiċ-ċentri tal-ittestjar.
It-Tlieta 29 ta’ Diċembru, it-tilqima se tasal fil-gżira Għawdxija hekk kif se jitlaqqmu l-ħaddiema tal-Isptar Ġenerali ta’ Għawdex,
Fit-30 ta’ Diċembru se jitlaqqmu l-ħaddiema tal-Isptar Monte Karmeli, tal-isptar Boffa, tal-isptar San Tumas u dawl li jaħdmu fir-residenza tas-Samaritan it-Tajjeb, f’San Pawl il-Baħar.
Fl-ewwel sitt ijiem tas-sena l-ġdida se jitlaqqmu l-ħaddiema u l-pazjenti kollha tal-Isptar San Vinċenz De Paul u ħaddiema tal-isptarijiet, kliniċi privati, u spiżjara li jaħdmu fil-komunità.
Fis-7 ta’ Jannar se jibdew jintbagħtu l-ewwel ittri lill-pazjenti li għandhom iżjed minn ħamsa u tmenin sena.
Pajjiżna se jirċievi sitt mitt elf doża tal-kumpanija BioNTech u Pfizer, mitt elf doża tal-kumpanija Moderna u miljun doża tal-AstraZenica.
