Marcelle Genevose għal dawn l-aħħar tletin sena kienet involuta fl-industrija tal-films bħala artista tax-xagħar fuq għadd ta’ atturi ċelebri fid-dinja ċinematografika.
Waqgħetilha żokritha fis-settur, filwaqt li dejjem żammet saqajha mal-art. Fost oħrajn, hija kienet minn ta’ quddiem fl-arti tax-xagħar tal-epoka, f’films bħal Kingdom of Heaven ta’ Orlando Bloom, Carmen, All the Money in the World, Last Duel ta’ Matt Damon u Ben Affleck u Napoleon bl-eks attur ta’ Gladiator Joaquin Phoenix jintepreta l-parti tal-Imperatur Napuljun.
Il-film Gladiator 2 huwa s-sitt film tagħha tad-direttur eċċezzjonali Ingliż Ridley Scott. Blockbusters oħra fuq il-liżar taċ-ċinema li Genovese ħadmet fihom jinkludu Thor, Ferrari, Troy, Snow White and the Huntsman u oħrajn.
Ix-xogħol impekkabli tagħha laqqagħha ma’ għadd ta’ stilel ta’ films internazzjonali bħal Anthony Hopkins f’Thor, Chris Hemsworth f’ Extraction u Patrick Dempsey fil-film Ferrari fost oħrajn.
Il-film Gladiator 2 li ħafna minnu nġibed f’pajjiżna u l-Marokk, huwa wieħed mill-aħħar xogħlijiet li Genevose ħadmet qatigħ fih. Hija tkellmet quddiem il-camera ta’ ONE News dwar is-sehem tal-Maltin fi produzzjoni kbira bħal ma’ hija dik ta’ Gladiator. Hija ddeskriviet il-crew ta’ hairdressers li kellha taħtha fi ħdan Gladiator 2.
“In-nies li kelli miegħi fil-film Gladiator ilhom jaħdmu miegħi ħafna snin u kelli ġodda wkoll li bdew dawn l-aħħar sentejn li qed nipprova nħaddimhom kemm nista’ biex jitgħallmu s-sengħa biex ikollna iktar nies Maltin jaħdmu fis-settur tal-films speċjalment fis-sengħa tax-xagħar. Dan xogħol speċjalizzat jiġifieri tista tkun l-aqwa hairdresser ta’ salon però meta tiġi biex tagħmel il-films huwa xogħol differenti. Kburija bil-Maltin li kelli miegħi għax kienu tajbin daqs u ġieli aħjar mill-barranin.”
Genevose irrakkontat ġurnata tipika waqt il-ġbid ta’ Gladiator 2.
“Waqt il-ġbid ta’ Gladiator, mhux il-films kollha jkunu hekk, għax Gladiator huwa tsunami mhux film. Meta għandek film ta’ sitt xhur u għandek sitt mitt extra kuljum, dak film kbir. Jekk huma jridu jibdew jiffilmjaw fuq is-sett fid-disgħa ta’ filgħodu inti trid tkun hemm fl-erbgħa ta’ filgħodu, biex tagħmel sitt mitt ruħ u dawn kollha bil-kostum għax film bil-kostum jieħu ħafna iktar żmien.”
Genevose irrakuntat ukoll l-isfida sabiex kull attur jiġi ppreparat b’qata’ xagħar tal-epoka ta’ dak iż-żmien, li hija ferm differenti minn dik tal-lum il-ġurnata.
“Ħafna minnhom bil-parrokki għax peress li tal-epoka allura l-qtugħ tax-xagħar tal-lum mhux tajjeb, jiġifieri anki l-irġiel bil-parrokki u stil differenti għax ruman jiġifieri fih ħafna u ħafna xogħol. Nibdew nagħmlu x-xagħar imbagħad meta lin-nies noħduhom fuq is-sett, il-ġurnata kollha rridu nieħdu ħsiebhom. Kull take ikolli grupp ta’ nies fuq is-sett u jmorru jirranġawlhom u Gladiator ma kienx faċli bi sħana li kienet. Kif jispiċċa l-filming hemm mill-inqas sagħtejn biex nerġgħu nneħħu kollox li nkunu għamilna filgħodu. Jiġifieri il-ġurnata mill-inqas tlettax, erbatax-il siegħa.”
