Il-Prim Ministru Robert Abela saħaq li għaddejjin aktar diskussjonijiet biex Malta tilqa’ għall-impatt inflazzjonarju fis-settur tal-ikel riżultat tal-gwerra fl-Ukrajna u l-imblukkar ta’ kunsinji tal-qmuħ minn qawwiet tal-baħar Russi, fil-Baħar l-Iswed.
Meta kien qed iwieġeb għall-mistoqsijiet tal-ġurnalisti f’Kastilja waqt konferenza tal-aħbarijiet, Dr Abela rrimarka għal dak li sar, bħall-investiment ta’ €70 miljun fin-nies, il-ftehim mal-importaturi tal-qamħ u l-ġwież u l-istabilità fil-prezzijiet tal-enerġija.
Il-Prim Ministru nnota wkoll li t-traħħis fil-prezzijiet tal-fjuwil li daħħal Gvern Laburista f’Ġunju ta’ sentejn ilu, għadu hemm.
Spjega li fil-prezz tal-fjuwil hemm differenza massiva ta’ dak li qed iħallsu l-konsumaturi f’pajjiżna u f’pajjiżi oħra fl-Ewropa.
Dan hekk kif f’numru ta’ pajjiżi Ewropej, il-prezz tal-fjuwil kważi jqarreb id-doppju ta’ dak f’Malta.
“Għamilt eżempju ċkejken ta’ dak illi konsumatur ta’ vettur privata u għamilt kalkolu tiegħi bbażat fuq konsum ta’ diesel ta’ €35 fil-ġimgħa. Min jagħti lill-vettura tiegħu €35 diesel fil-ġimgħa llum, qiegħed jiffranka €21 fil-ġimgħa biex inkun preċiż. Kieku l-prezz tad-diesel kellna nagħmluh mingħajr ma nagħtu s-support.”
Prim Ministru Robert Abela
Dwar l-aħħar żviluppi fuq il-gżira ta’ Kemmuna, il-Prim Ministru rrimarka li ttieħdet deċiżjoni minnufih li ħolqot bilanċ.
Lil hinn mill-każ ta’ Kemmuna, Dr Abela saħaq li l-bilanċ jista’ jinstab.
“Dik li kontinwament illi nippruvaw insibu bilanċ bejn id-dritt għall-poplu illi jgawdi areas pubbliċi u dak huwa dritt sagrosant li ħadd ma jista’ jtellef lill-pubbliku milli jgawdi u fl-istess waqt illi nħallu l-operaturi ekonomiċi li jistgħu jkunu għaddejin fuq l-investiment tagħhom. Issa mhux qed ngħid fuq il-każ ta’ Kemmuna imma qed ngħidha b’mod ġenerali. U nemmen li s-sinerġija tista’ tinstab, bilanċ jista’ jinstab.”
Prim Ministru Robert Abela
Mistoqsi mill-ġurnalisti dwar l-Avviż Legali dwar il-mużika fil-Belt, il-Prim Ministru spjega li fil-prattika, l-infurzar idonju jrid jara li jilħaq il-bilanċ rifless fl-Avviż Legali.
Hawn aċċenna li ma jridx jagħmel lill-Belt, Paceville ieħor.
“Ma għandna l-ebda intenzjoni li l-Belt nagħmluha Paceville ieħor, nixtieq niċċaraha. Dak li qed naraw fil-Belt, għal min iżur il-Belt fil-ħinijiet ta’ filgħaxija, qed naraw entertainment ta’ kwalità. Qed naraw artisti Maltin illi qegħdin idoqqu l-mużika fil-ħwienet, artisti li ilhom sentejn u nofs ma jaqiglħu xejn, xejn, għexu bil-bare minimum il-Wage Supplement tal-Gvern. Bit-800 tal-Gvern. Illum fortunatament għax ħdimna bil-għaqal, qegħdin jikkummentawlna li għandhom xogħol mhux qegħdin ilaħħqu bih u hekk jixirqilhom l-artisti tagħna, u nemmnu ħafna fihom. L-istess l-istabbilimenti kummerċjali, sentejn u nofs ta’ diffikultajiet finanzjarji imma l-appell tiegħi jibqa’ għal dawk ir-residenti li d-drittijiet tagħhom ta’ mistrieħ fil-jiem tax-xogħol imma anki fil-weekends iridu jiġu rispettati.”
Prim Ministru Robert Abela
Dwar il-ħaddiema tal-Air Malta li se jiġu trasferiti lejn entitajiet oħra tal-Gvern, il-Prim Ministru saħaq li dan mistenni jseħħ sa Awwissu u ta s-serħan il-moħħ li l-Gvern se jżomm mal-wegħda tiegħu.
Il-Prim Ministru saħaq li l-linja nazzjonali tal-ajru għandha futur u bl-amministrar ta’ dawn l-aħħar xhur, l-Air Malta qed tara rkupru fl-operat tagħha.
