Fuq il-midja soċjali, il-Fondazzjoni Puttinu Cares tellgħet filmat tal-mibki t-Tabib Victor Calvagna waqt li jiskorja lill-goalkeeper leġġenedarju Gianluigi Buffon.
Għalkemm ma qalitx ir-raġuni li kienet qed ixxerred il-filmat, dan żgur ifakkar kif fl-umiltà tagħha, iżda b’ħidma sfieqa favur tfal milqutin mill-kanċer, l-organizzazzjoni rnexxielha maż-żmien tisraq il-qlub tal-Maltin u l-Għawdxin.
Il-kofundatur u eks President ta’ Puttinu Cares kien tilef ħajtu fl-4 ta’ Jannar tal-2023 fl-għomor ta’ 63 sena wara li kien sofra minn ġrieħi serji wara li ttajjar qrib l-Akwarju Nazzjonali fil-Qawra waqt li kien qed jagħmel eżerċizzju fiżiku.
Hu kien għamel tmint ijiem jissielet għal ħajtu fit-Taqsima tal-Kura Internsiva fl-Isptar Mater Dei.
Calvagna, li kien l-ewwel Onkologu tat-tfal f’pajjiżna, kien magħruf għall-imħabba tiegħu lejn l-isports u l-atletika, u f’dan il-filmat jidher jieħu ċ-ċans li jiskurja lil-leġġenda tal-futbol Taljan.
