“Ma fadal issa ebda dubju li fid-deal tal-Lowenbrau, kien hemm intervent politiku u kompromess li fisser li l-pajjiż daħħal biss 700 elf għal art ta’ 21 tomna li tiswa tmien miljuni.”
Dan kien kliem il-Ministru għall-Ġustizzja, Kultura u Gvern Lokali Owen Bonnici waqt konferenza tal-aħbarijiet, wara li lbieraħ ippublika xhieda fil-Qorti ta’ Zaren Vassallo nnifsu.
Bil-ġurament, Zaren Vassallo qal li “irċieva risposta mil-Lands għax jiena tkellmt u anke kont mort għand il-Ministru responsabbli dak iż-żmien u r-risposta kienet lesti npoġġu madwar mejda u nsibu kompromess”.
Il-Ministru Bonnici qal li wara ġimgħatejn ta’ Jason Azzopardi jiċħad li ltaqa ma’ Zaren Vassallo u offrilu kompromess, illum għandna mhux hearsay kif qal Jason Azzopardi lbieraħ, mhux affidavit falz, imma xhieda bil-ġurament fil-Qorti li wara d-deal tal-Lowenbrau, kien hemm laqgħa mal-Ministru tal-Lands u wiegħda li se jintlaħaq kompromess.
“X’kien dan il-kompromess?” staqsa Bonnici, u fisser li Zaren Vassallo spiċċa jħallas il-valur li kellha l-art fl-1990, minflok il-valur li kellha l-art fl-2012.
Osservazzjoni li għamel Owen Bonnici fiċ-Ċentru Nazzjonali Laburista hija li Jason Azzopardi ilbierah tilifha għall-kollox u li kulħadd seta jara kemm kien skomdu u maħsud, u li reġa’ nqabad, din id-darba bil-kbir.
Il-Ministru qal li l-unika difiża li seta joħroġ biha Jason Azzopardi hija li mhux hu kien il-Ministru. “Mela ilu ġimgħatejn jiftaħar kemm ħa azzjoni dakinhar, u bgħatlu ittra….u issa mhux hu kien il-Ministru” tenna Bonnici.
Żied jgħid li l-Awditur Ġenerali tkellem u semma lil Jason Azzopardi, u li l-kuntratt ġie iffirmat minn Jason Azzopardi. Issa, sostna Bonnici, iridna nemmnu li mhux hu kien li ltaqa ma’ Zaren Vassallo, imma Ministru ieħor.
“Jekk għal sekonda nemmnu lil Jason Azzopardi li Zaren Vassallo ma kienx qed jirreferi għalih, allura l-istorja issa kibret sew” żied jgħid il-Ministru responsabbli mill-Ġustizzja, filwaqt li żied jgħid li mhux biss għandna lil Jason Azzopardi, li fi kliem l-Awditur għandu jassumi r-responsabbilità, imma issa daħal fix-xena l-eks Ministru Tonio Fenech. Li skont Jason Azzopardi x-xhieda ġuramentata qed tirreferi għalih.
“Jiġiferi mhux problema waħda għandu Simon Busuttil, imma tnejn issa”.
Bonnici qal li issa nafu bħala stat ta’ fatt – wara ġimgħat jiċħdu – li Zaren Vassallo iltaqa’ ma’ Ministru u ġie imwiegħed kompromess. Ir-riżultat aħħari ta’ dan il-kompromess huwa li Zaren Vassallo ħeles mill-obbligazzjoni li fuq dik l-art jista jkollu biss birrerija, u minflok bena imperu. Biex imbagħad ,kumbinazzjoni xahar wara d-deal, għadda għotja ta’ kwart ta’ miljun lill-Partit Nazzjonalista li skont Ann Fenech ghadu ma tħallasx lura.
“Jason Azzopardi, b’dak li qal l-Awditur biss, għandu jerfa r-responsabbiltà politika” qal Bonnici, u żied li lbieraħ kulħadd seta jara b’għajnejh kemm qed dahru mal-art, aggressiv u isteriku biex jipprova jsalva postu.
Temm jgħid li kulħadd qed jistenna li Simon Busuttil juri l-bieb ta’ barra lil min zbalja skont l-Awditur Generali u lil min iltaqa’ u wiegħed kompromess lil Zaren Vassallo skont xhieda ġuramentata fil-Qorti.
