Il-proġett, li se jara l-junction ta’ Pembroke tiġi riġenerata biex tnaqqas id-dewmien tat-traffiku, jinsab fl-istadji inizjali tiegħu hekk kif issa beda x-xogħol fiżiku fuq il-post. L-investiment fil-proġett ilaħħaq l-€4 miljun.
Dwar dan il-proġett tkellimna ma’ uffiċjali ta’ Intrastructure Malta, li spjegawlna aktar dwar x’se jkun jikkonsisti dan il-proġett mifrux fuq medda ta’ sitt mija u sittin metru.
Fil-fatt, fiż-żona fejn qiegħed isir il-proġett u li minnha jgħaddu mal-erbat elef u ħames mitt vettura fis-siegħa fl-aktar ħinijiet tat-traffiku, se jkun qed jara li t-traffiku lejn it-Tramuntana tal-pajjiż u dak lejn in-Nofsinhar ikollhom karreġġjati kontinwi.
B’hekk se jitnaqqas sett ta’ traffic lights li bħalissa jinsabu parti mill-insfrastruttura. Minflok wieħed se jkun jista’ jagħmel użu minn dawk imsejħa ‘hairpins’ biex it-traffiku jibdel id-direzzjoni, simili għal kif diġà sar bejn Ħaż-Żebbuġ u s-Siġġiewi, mingħajr ma jiġi ostakolat traffiku li jkun għaddej minn direzzjonijiet ulterjuri.
Sakemm il-proġett ikun għaddej, Infrastructure Malta ħasbet biex it-tibdil marbut miegħu jkun minimu kemm jista’ jkun anke fid-dawl li fil-ġimgħat li ġejjin se jingħata bidu għal sena skolastika ġdida.
Dwar x’se jkun qiegħed jiġri mit-traffiku li jiffrekwenta dawn l-inħawi, tkellmet magħna l-Perit responsabbli mill-proġett, Corinne Dimech, li spjegat kif dawk li jkunu ġejjin min-Nofsinhar lejn Baħar iċ-Ċagħaq it-triq se tibqa’ l-istess kif inhi llum.
Qalet, “L-istess dawk li ġejjin minn Baħar iċ-Ċagħaq ’l isfel jistgħu jipproċedu fuq St Andrew’s Road b’mod normali. Id-differenza li ħa jkun hemm hi għall-karozzi li jixtiequ jaċċessaw bejn Pembroke u s-Swieqi. Dan għax se jkollna aċċess partikolari mill-Junction ta’ Pembroke li se jingħalaq u għaldaqstant il-karozzi se jkollhom jaċċessaw il-junction il-ġdida min-naħa ta’ High Ridge, jibqgħu neżlin parti minn St Andrews u jistgħu jidħlu lejn is-Swieqi min-naħa ta’ Triq l-Ibraġġ.”
Dawn li jiffrekwentaw l-inħawi permezz tal-mixi, b’mod partikolari minħabba t-trasport pubbliku, ukoll se jkunu qegħdin igawdu minn dan il-proġett li se jiffaċilita l-mod li wieħed jaqsam it-toroq bih biex ikun aktar sigur.
Dan minbarra li l-proġett se jkun qiegħed irodd lura art konsiderevoli ddedikata għal-landscaping daqs dik li ttieħdet biex parti mill-proġett tista’ titwessa. Fil-fatt huma numru ta’ siġar li kienu mħawla mill-istess aġenzija fl-aħħar snin li se jitmexxew lejn il-qalba tal-proġett.
Il-proġett tal-junction ta’ Pembroke mhux wieħed iżolat, iżda se jkun qiegħed iservi ta’ preparazzjoni għal proġetti li se jibdew fis-snin li ġejjin u li se jkomplu jiffaċilitaw il-mogħdija tat-traffiku mill-inħawi, kif jispega Raphael Abdilla, li hu d-Direttur Eżekuttiv tal-aġenzija.
Qalet, “Fis-snin li għaddew konna bdejna bil-Junction ta’ High Ridge, issa qed naraw it-triq li hi l-arterja bejn High Ridge u Paceville Junction. Il-proġett hu antiċipazzjoni għal proġett akbar, bażikament il-Junction ta’ Paceville ħa tkun qed tiġi upgraded fis-snin li ġejjin biex ikun hemm multi-level junction simili tal-Kappara.”
Il-proġett tal-junction ta’ Pembroke mistenni li jkun iffinalizzat sal-ewwel kwart tas-sena d-dieħla, filwaqt li partijiet minnu mistennija li jibdew jintużaw mill-pubbliku minn qabel.
